ORANJESTAD,Aruba
Den cuadro di cooperacion cu Aruba Airport Authority N.V. y Royal Schiphol Group N.V., minister di Husiticia mr. Andin Bikker a haya aprobacion di Conseho di Minister pa Pais Aruba por tuma over dos Airport Crash Tenders, cual ta trucknan special pa Dienst Brandweer Aruba (DBA) por combati candela riba tereno di aeropuerto.
E Crash Tenders ta di marca E-One, di fabricacion Mericano (Ocala, Florida), ta tecnicamente den estado perfecto di mantencion y lo yuda Dienst Brandweer Aruba pa por duna asistencia adicional pa e proximo añanan.
Pais Aruba ademas tin opcion pa laga haci modificacionan special pa DBA y yega na un Service Level Agreement pa mantene e Crash Tenders den condicion optimo. E opcion pa tuma over e dos Crash Tenders a bin na un momento propicio ja cu pa basta tempo caba Gobierno di Aruba tabata tin e reto di kier busca por lo menos un Crash Tender adicional, pero debi na e retonan financiero di Pais Aruba no por a logra haya espacio suficiente pa un inversion substancial.
Cu e dos Crash Tenders aki Pais Aruba lo tin espacio den tempo te ora e situacion financiero recupera debidamente. Minister di Husticia ta gradici entre otro sr. Joost Meijs CEO di AAA N.V. pa a intermedia pa e opcion aki por a materialisa, su colega Minister di Turismo, Salubridad y Deporte sr. Dangui Oduber pa e cooperacion continuo riba e tema, y Dienst Brandweer, Sindicato SINBA y Parlamento di Aruba pa e pasenshi.
