Ku e dianan di fiesta na kaminda, entidat públiko Boneiru ta hasi un yamada
riba nos habitantenan i nos bishitantenan pa tene kuenta ku bienestar di nos bestianan.
Kambio di aña ta un periodo festivo, pero e por sòru pa strès i peliger tambe pa e
bestianan na nos isla. Entidat públiko Boneiru ta pone énfasis riba importansia di
komportashon responsabel pa limitá e impakto riba bienestar di nos bestianan.
Vürwèrk i bestia: un kombinashon yen di strès
Sonido duru i lus skèrpi di vürwèrk ta duna hopi bestia di kas, bestia ku nos ta kria pa
kome i bestia di mondi na Boneiru hopi strès. Esaki por kondusí na reakshon di pániko,
herida i miedu duradero. Pa e motibu akí entidat públiko Boneiru ta urgi tur hende pa hasi
uso responsabel di vürwèrk pa tantu hende komo bestia.
Kiko bo por hasi pa fomentá bienestar di bestia?
Tene bestia di kas paden: Sòru pa kachó, pushi i otro bestianan di kas ta na un
lugá trankil i seif den kas durante kambio di aña.
Informá bo mes tokante reglanan di vürwèrk: Usa únikamente vürwèrk legal i
tene kuenta ku e orarionan i sitionan stipulá kaminda ta pèrmití vürwèrk.
Evitá uso di tiru duru: Preferibelmente skohe pa vürwèrk sin sonido ku ta
okashoná ménos strès serka bestia.
Hasi notifikashon na tempu di sierto señalnan: Mèldu bestia heridá òf bestia
konfundí mesora serka Protekshon di Bestia Boneiru (Dierenbescherming
Bonaire) òf otro instansianan relevante.
Huntu nos ta sòru pa un temporada di fiesta ku kariño pa bestia
E dianan di fiesta ta un temporada pa nos ta huntu i selebrá, pero tambe un momentu pa
mustra responsabilidat pa naturalesa i e bestianan na nos isla. Entidat públiko Boneiru ta
traha estrechamente huntu ku organisashonnan lokal di besta ku ta aktivo na Boneiru pa
engrandesé konsientisashon i pa tuma akshon. Nos ta enkurashá tur habitante i turista pa
kontribuí aktivamente na un ambiente ku kariño pa bestia.
Paga tinu: Protehá Bienestar di Bestia durante Dianan di Fiesta na Boneiru
