Pabien na e participante y ganadonan di diferente categoria durante e campeonato di Copa Latino Americano BMX 2023. Durante fin di siman, a tuma luga e campeonato internacional Copa Latino Americano BMX 2023 na e pista di BMX di Parke Curazon Jaburibari cu rond di 170 coredo di 11 pais, entre otro, Argentina, Aruba, Belgica, Brasil. Chile, Colombia, Curaçao, Ecuador, El Salvador, Mexico y Venezuela. Minister di Enseñansa y Deporte Minister Endy Croes tabata presente hunto cu Aruba Wieler Bond y comision di BMX, kendenan ta organisado di e campeonato Copa Latino Americano BMX 2023.
Tambe tabatin diferente presidente di federacion internacional presente, entre otro, Confederacion Latino Americana de BMX (COPAB), Union Cycliste Internationale (UCI), Confederación Panamericana de Ciclismo (COPACI). E bishitantenan internacional a expresa di ta hopi contento cu e pista nobo di BMX, cual ta cumpli cu e standardnan internacional. Un tremendo campeonato, unda cu a entrega diferente premio den diferente categoria.
Minister Endy Croes ta felicita tur e participante- y ganadonan di e campeonato Copa Latino Americano BMX 2023. E careda aki tabata valido pa acumula puntuacion pa clasificacion pa Weganan Olimpico 2024. E mandatario di Deporte ta gradici tur esnan cu a contribui pa realisa e proyecto aki, esta Ministerio di Deporte, Gabinete Wever – Croes II, Fundacion Facilidadnan Deportivo (FFD), Lotto pa Deporte, N.V. Elmar, Quick Electrical N.V., Timeline Services, Aruba Wieler Bond (AWB), comision di BMX, ATA y e mayornan cu a traha hunto pa por a logra realisa e bunita proyecto aki pa nos hobennan.
![Pabien Na Tur Cu A Contribui Pa Haci Campeonato Internacional Copa Latino Americano Bmx 2023 Na Aruba Exitoso 156 Pap Pabien Na Tur Cu A Contribui Pa Haci Campeonato Internacional Copa Latino Americano Bmx 2023 Na Aruba Exitoso 3 Scaled](https://www.eanews.com/wp-content/uploads/2023/09/PAP-Pabien-na-tur-cu-a-contribui-pa-haci-campeonato-internacional-Copa-Latino-Americano-BMX-2023-na-Aruba-exitoso-3-scaled.jpg)