Ley di Admision y Expulsion no mester concentra solamente pa persigui, detene y deporta esnan ilegal. Mester percura tambe pa esnan cu ta cana e caminda legal no wordo perhudica.
Polis a cuminsa cu control di trafico pero den esaki tambe ta controla personanan stranhero pa nan documentonan. Recientemente tabatin un caso cu durante e control tabatin un persona cu su papelnan ta den proceso. Normal ta cu Polis lo mester controla cu DIMAS.
Na momento cu a bay haci esaki, no a logra haya comunicacion cu DIMAS sino te den oranan di mainta. Eynan a bin tende cu e papelnanta den proceso pero e sistema ta down y no a logra keda cla. E consecuencia tabata cu e persona aki, cu despues a resulta cu e no a viola ley di Aruba, mester a pasa henter un anochi den cel innecesariamente. Y asina tin mas caso similar.
E situacion ta uno serio cu ta perhudica companianan. Asina tin empresanan cu trahadonan na cas en espera pa finalisa e tramitenan of documentonan.
Hasta mundo deportivo ta wordo perhudica cu e sistema down. Campeonato a cuminsa y esnan cu tin deportistanan stranhero contrata tambe a keda den un limbo. Nan mester simplemente laga e futbolistanan aki for di wega pa e simpel motibo cu no a finalisa di procesa nan documentonan, mescos cu un cantidad di otro peticion di diferente sector.
E area mas afecta ta economia di Aruba. Tur hende mester bay segun regla, pero haciendo esaki e comerciantenan ta wordo perhudica tambe cu un sistema cu cada biaha ta down. Nan mester di e trahadonan, tin nan pero no por uza nan ya cu nan papelnan no ta cla. Haci cos di e forma legal parce no ta yuda tampoco.
Gobierno mes ta wordo perhudica cu e sistema deficiente na DIMAS aworaki. Si bo tin mil persona cu no por subi mercado laboral pasobra nan permiso no ta cla, ta basta placa ta keda sin drenta den caha di Gobierno y na SVB.
E situacion aki ta exigi un solucion rapido. Pa combati ilegalnan mester drecha e situacion di esnan cu ta cana e caminda legal ya cu de lo contrario e sistema ta stanca economia y hopi gasto extra, sin e entradanan cu gobierno mester haya.
