Un kompa melódiko ku un ‘vibe’ di Calipso. ‘HONEY PEOPLE’ ta e promé kolaborashon entre Stanley i Nando, kende respektivamente a marka pauta na Aruba i Kòrsou, i awó ta representa nos dushi islanan den Karibe.
‘HONEY PEOPLE’ ta un kantika alegre, perfekto pa e temporada festivo aktual, ku ta konektá ku e temporada di karnaval. E kantika lo keda promové internashonalmente i tambe na diferente islanan den Karibe manera Martinique i Guadalupe, kende ta amante di e ritmo di kompa karnavalesko. Ku e videoclip di ‘HONEY PEOPLE’, Stanley i Nando ta indiká ku e alegría ilustra ta asina infeksioso ku esaki ta aplikabel pa henter aña.
Stanley Clementina
Na komiendo di aña, Stanley a saka e kantika ‘Masha Ten’ ku su banda C-Shaw, un ‘cover’ na papiamentu di e kantika ‘Bon bon’ di e banda haitiano Enposib, ku a subi diferente lista di radio na Aruba, Boneiru i Kòrsou. Stanley a popularisá huntu ku C-Shaw, e Kompa karibense riba nos islanan i bou di e bandanan popular lokal i na Hulanda. ‘Se Sua’, ta e promé piesa ku Stanley i C-Shaw a graba kompletamente ‘live’. Despues Stanley a deleita nos ku hitnan manera Quarantaine’ na 2020, sigui pa e infeksioso Kompa titula ‘Kompronde’ na 2021. Tambe Stanley a kontinuá su kolaborashon musikal ku kantante Jayh Jawson, unda ya pa algun aña e ta funkshona komo su direktor musikal. Según Jay Jawson, e kolaborashon ku Stanley a motivé pa interpreta mas kantika riba e ritmo di Kompa i a produsí hitnan memorabel manera ‘Wowo Sera’, ‘Amor Sekreto’ i e kolaborashon ku Stanley titula ‘Mijn Only’. Aktualmente Stanley ta na Kòrsou ku STEEZ MUSIC BAND kende lo kampaña Jayh Jawson durante e fiesta di mas grandi di fin di aña ku ta ‘Desire’ na Festival Center. Banda di Jayh Jawson, lo presenta Ir-Sais, Dopebwoy, Ray i muchu mas.
Nando Chirino
Na 2022, Nando Chirino tambe a laga su marka ku ‘To Love Somebody’, un ‘cover’ di e banda Beegees riba e ritmo di Kompa, ku keda produsí pa Stanley Clementina. Nando tin más ku 30 aña den farándula antiano i rubiano, unda ela milita den diferente banda na Aruba i Hulanda. Na un edat hóben Nando a bai biba Hulanda, pero despues di tempu ela muda pa Aruba, unda ela milita dies aña éksitosamente den Super Orquesta Quasi, Ricochet i OREO. Na aña 2002, Nando a regresa bèk na Hulanda i einan tambe ela sigui desaroyá su mes musikalmente. Fo’i 2006, Nando ta formando parti di e banda ‘La Fiesta’ unda e ta e kantante prinsipal. Ku ‘La Fiesta, Nando ta gosa di un akohida enorme na Aruba, Sürnam i Hulanda, i asina a kompartí esenario ku varios artista konosí na Europa, manera e propio kantante i areglista Stanley Clementina.
‘HONEY PEOPLE’, ta e promé kantika unda Stanley i Nando ta kanta huntu, pero ambos artista tin diferente proyekto interesante na kaminda. Stanley ta finalisando un proyekto ku rapper i kantante kongoles – belgikano Bryan MG, unda nan lo lansa varios produkshon rònt di mart 2024.
Pa keda na altura di Nando Chirino su presentashon of proyekto, su página di Instagram@nando_chirino i Facebook.com/Nando-Chirino, of emeil na bookings@nandochirino.com pa mas informashon. Pa sigui Stanley Clementina su proyektonan musikal, akudí na e página sosial di Stanley Clementina na Facebook.com/stanley.clementina i Instagram @stanleyclementina.
