Minister Ursell Arends a ser yama den parlamento pa fraccion di AVP y fraccion di MAS cu lo ta hopi interesa riba e maneho cu e mandatario ta hibando y e decision cu a keda tuma door di e mandatario pa no subsidia fundacion SABA mas. Na e prome palabranan cu Minister Ursell Arends a hiba ta duna di conoce cu e ta hopi contento cu e reunion aki ta tuma luga y por trece un claridad y e berdad pa loke ta trata e maneho di asuntonan di adultonan mayor cu porfin ta keda treci padilanti.
Tambe e mandatario a expresa cu e la tuma e posicion di ta un gobernante elegante den full e proceso aki y scoge di no hiba palabra den prensa y a cana e trayectorio formal cu mester wordo cana, pero aunke den varios ocasion lider nan di oposicion a bay den prensa y si mester expresa e parti aki den un forma croyoyo “ no tabata falta palo pa suta cacho” pero sinembargo e realidad ta un so tin, segun e mandatario.
Tambe ta spera cu na momento cu e berdad sali padilanti ta spera cu ningun hende no ta sali pidi pordon, paso ta hopi dia tras di otro a wanta mentiranan y insinuacionnan inhusto bin dilanti pa loke ta trata maneho di asunto di adulto mayor, asina e mandatario a expresa
E berdad ta cu e partidonan den oposicion cu awe ta grita den parlamento y pafo di parlamento , loke nan como partido tabatin como vision pa nos adultonan mayor ta un ‘zin “ masha cortico den henter nan vision y maneho pa nos adultonan mayor na Aruba.
Sinembargo den e plan y vision di partido RAIZ a traha dos pagina cu ta encera e maneho di adulto mayor na Aruba. Segun Minister Ursell Arends a traha un programa y a pone un vision y mision cu unabes cu lo a yega den gobierno of parlamento lo ehecuta esaki. Segun e mandatario actualmente ta atendiendo cu e vision aki punto pa punto.
Pero di otro banda Minister Ursell Arends ta reacciona riba oposicion di mas grandi den parlamento cu ta sali grita y duna critica di oportunista pa loke ta trata e tema di asunto di adulto mayor pero den nan propio plan di gobernacion nan tin solamente un regel cu ta menciona “ Nos ta percura pa nan tin acceso na actividadnan cu ta enrikece interes di nos grandi nan y duna nan maneranan significativo pa comparti nan experiencia y conocemento” Segun Minister Ursell Arends esaki ta e vision di partido AVP pa nos adultonan mayor na Aruba.
Pa loke ta trata e situacion actual di situacion di adultonan mayor na Aruba , e echo ta cu e comunidad di adulto mayor a conoce diferente desaroyo. E mandatario ta duna di conoce cu e ta sigur cu den tur e desaroyonan aki den diferente area ta danki na esfuersonan y sodo di mannan di nos adultonan mayor. Loke ta un realidad generacion pa generacion nos grandi nan a bin ta construi pais Aruba cu awe nos ta disfruta di dje. Segun minister Ursell Arends nos adultonan mayor merece un miho luga den nos comunidad , un luga cu nan por disfruta ampliamente cu e apoyo di nos comunidad.
Pa prome biaha den historia un gobierno ta establece un ministerio pa adultonan mayor y esaki ta e prome paso real pa duna atencion y duna e cuido debido na nos adultonan mayor pa nan por haya e luga den sociedad y e atencion cu nan tin derecho riba dje. Segun minister Arends esaki tambe ta crea oportunidadnan den e maneho cu gobierno di Aruba ta hibando pa haci un impacto na bienestar di nos adultonan mayor.
Minister Ursell Arenda a vocifera cu e ta imagina su mes un Aruba unda cu e adultonan mayor por disfruta di nan bida cu orguyo y dignidad y energia positivo. Tambe ta mira cu adultonan mayor por ta participativo den nos comunidad.
1 comment
[…] Source link […]