Ku gran asombro i hopi desapuntá, miembro di Parlamento pa frakshon di MFK, Ramón Yung a tuma nota dje resiente desishon di gobièrnu ulandes, pa refinansiá e fiansanan durante Corona, kontra un interes di 5.1% E desishon sigur ta kousa pregunta, esta si esaki ta na bienestar di Kòrsou. E desishon ta mustra di ta bai kontra bienestar di Kòrsou, manera indiká den e karta ku gobièrnu a manda pa sekretario di estado sra. Van Huffelen dia 10 di òktober último.
Den un karta dirigí na sekretario di estado sra. Van Huffelen dia 13 di òktober ultimo, parlamentario Yung ta mustra ku miembronan dje tim negoshadó di Kòrsou dia 18 di yüli ultimo a indiká na ámtenarnan ulandes ku e kondishonnan ku Ulanda a fiha riba e posibel fiansa pa Ennia ta fuera di proporshon. Dia 23 di yüli dje aña aki, gobièrnu di Kòrsou mes a haña su mes obligá di manda un karta i hasi un yamada na gobièrnu ulandes pa yega na un solushon mas aseptabel. Intento pa yega na otro alternativa, tur tabata envano. Ademas, a mara refinanshamentu dje fiansanan durante Corona na un solushon pa e kuestion di Ennia promé ku dia 10 di òktober 2023.
E forma di proseder aki ta hiba komunidat di Kòrsou bèk na e periodo di negosashon entre gobièrnu di Kòrsou i e sekretario di estado saliente, sr. Knops, kende tambe tabata pone preshon pa aseptashon dje lei di konsenso COHO, apesar ku tantu Raad van State komo Raad van Advies Kòrsou a duna un konseho negativo riba esaki. Parlamentario Ramón Yung komokiera tin komprenshon ku gobièrnu ulandes a fiha kondishonnan na refinanshamentu dje fiansanan di Corona, debí na inkumplimentu dje gobièrnunan anterior, pero e situashon aki sigur ta lanta pregunta relashoná ku outonomia dje paísnan.
Durante pandemia tabata nesesario pa Kòrsou siendo parti di Reino ulandes, pidi sosten finansiero pa por a superá e konsekuenshanan dje pandemia. Ulanda a duna Kòrsou sosten finansiero, pero parlamentario Yung, hamas por a maginá su mes ku Ulanda lo a imponé tarifanan di interes haltu pa Kòrsou, siendo ku tabata trata di fiansanan ku finnan humanitario. Esaki sinseramente ta kontrali na un pensamentu pa yuda, aliviá i sostené esnan ku ya ta den un situashon difísil.
Den e karta ku sekretario di estado van Huffelen a manda pa Tweede Kamer dia 4 di aprel 2022, e mes a enfatisá ku e paisnan tin un ekonomia chikí i vulnerabel, kual durante e pandemia a bira muchu mas visibel. Sekretario di estado van Huffelen den su karta mas aleu a ekspresá su preokupashon riba e situashon di pobresa i a enfatisá riba e importansia pa perspektiva dje siudadanonan ta pará sentral. Tambe el a hasi un yamada pa a base di igualdat i resiprosidat, ku atenshon riba e relashon estatal, e desafíonan i posibilidatnan. Sekretario di estado van Huffellen a bisa ku por logra resultadonan konkreto pa siudadanonan dje pais, dor di traha di forma muchu mas estrecho i resposnabilidatnan mutuo.
P’esei mes un fiansa di 660 mion euro pa por a logra un “doorstart” di Ennia lo tabatin konsekuensianan serio ku lo a hasi Kòrsou finansiero-ekonómikamente i sosialmente, muchu mas vulnerabel. Cft na sigur tres okashon a atbertí pa NO tuma un fiansa di tal embergadura pa Ennia, pasó esaki sigur lo a bai hustamente kontra e deseonan ekspresá pa e sekretario di estado
van Huffelen, esta pa mehorá bida dje siudadanonan dje paisnan outónomo konsiderabelmente i hasi esaki mas duradero.
Resiéntemente pueblo di Kòrsou a apresiá momento ku sekretario di estado van Huffelen na nòmber di Rei i gobièrnu ulandes a pidi despensa pa e forma kruel ku a pone un fin na bida di Tula durante su lucha pa eliminashon di sklabitut. Sinembargo, ta parse ku tur e palabranan noble aki ta pèrdè nan balor ku anunsio dje “solushon” pa e situashon di Ennia, pasó e ta mustra mas den direkshon di sklabitut moderno i un politika di dividí i reina, ku sigur no ta na bienestar dje siudadanonan di e paísnan outónomo.
P’e motibu aki parlamentario Ramón Yung ta hasi un yamada na sekretario di estado van Huffelen i su tim, pa huntu ku e tim negoshadó di Kòrsou, yega na un solushon hustu i konstruktivo ku ta kuadra denter dje interesnan di Kòrsou i ku realmente ta duna kontenido na ekspreshonnan hasí pa e sekretario di estado sra. Van Huffelen anteriormente.
