Movementu Futuro Kòrsou (MFK) a tuma nota di e veredikto den korte riba kasamentu di e mesun
sekso i nos mester informá ku nos posishon komo partido riba e tema aki NO a kambia.
Ta bon pa nos rekordá tur hende ku Durante temporada di kampaña pa elekshon 2021, lider polítiko
di MFK a pone pensamentu di MFK hopi skèrpi, indikando den un debate ku MFK ta kontra di
kasamentu entre mesun sekso. Ta p’esei tambe den gobernashon, MFK a hiba e lucha aki kontra di
kasamentu di mesun sekso te na korte di kasashon.
Den e siman tras di lomba MFK a reuní ku su miembronan pa por a interkambiá ku miembronan
riba e tema aki i meskos na yegada di lider polítiko for di su vakashon, nos a reuní ku su persona pa
informe posishon di miembresia.
Nos ta lamentá ku via di korte mester imponé un desishon asina fundamental riba pueblo di Kòrsou.
Nos ta uni nos mes ku iglesianan i pa nos tambe Matrimonio ta un Sakramentu entre di hòmber i
muhé. E desishon aki di korte lo bai tin su efektonan sikológiko i emoshonal riba nos yunan i futuro
generashon.
Pa e motibu aki nos lo sigui kana e ruta pa kuida e instituto matrimonio i famia. Nos lo keda den
kombersashon ku iglesianan i otro gruponan ku ta pro famia, pa fortalesé kaminda ta nesesario nos
leinan ku ta protehá famia, libertat di religion i enseñansa di nos yunan.
Mundialmente e idea di género aki no ta konta ku un mayoria di nashonnan, poko poko por mira
kon paisnan ta birando bek for di e tendensia di ke mutilá mucha pa kambia sekso o adaptá e
sosiedat na e pensamentu ideológiko di esnan ku ta propagá kambio di género.
MFK no tin nada kontra personanan ku tin nan propio pensamentunan i eskoho di género i nos ta
respetá veredikto di korte, meskos ku nos ta spera korte lo respetá e dos otro pianan di nos trias
polítika.
Pa MFK, e prinsipio ku nos a lanta kuné for di enseñansa di beibel lo keda e forma kon nos ta sigui
mira matrimonio den komunidat di Kòrsou.
Direktiva di MFK