Un di e retonan grandi cu e industria di turismo pa Aruba a haya su mes confronta cu n’e pa 2021 ta entre otro e anuncio di e medida di testing pa e bishitantenan Mericano prome nan bolbe Merca. E medida aki a drenta na vigor dia 26 di januari 2021 y a pone cu hopi bishitante di Merca a regresa prome cu e fecha ey. Norte America ta e mercado mas grandi pa Aruba cu ta trece anualmente un average di 80% di e total di bishitantenan pa nos isla.
Naturalmente esaki –hunto cu otro factornan- tawatin su impacto riba e estadisticanan pa loke ta trata luna di januari – pero tambe pa e pronostico pa restante di e prome kwartaal di 2021 y e ahustacionnan pa e pronostico di 2021.
Debi na e diferente medida y scenarionan cu ta sigui cambia, AHATA a ahusta su proyeccion pa cu e grado di ocupacion pa e prome kwartaal di 2021 cu tawata proyecta pa 33% y awo ta proyecta pa 29%.
E cantidad di asientonan aereo for di Merca (e mercado mas grandi pa Aruba) pa e prome kwartaal ta mustra un caida actualmente di -14% (35.000 asiento menos) y awo ta proyecta na un total di 230.696 asiento.
Continuamente Aruba Tourism Authority ta revisa cifranan y tendencia debi na e situacion fragil cu cambionan frecuente y pa tal motibo ta trahando cu tres diferente scenario pa loke ta e recuperacion di nos turismo: Optimista, conservativo y cautelosamente optimista.
Actualmente ta observa un scenario conservativo pa 2021 despues di a revisa proyeccionan pa kwartaal uno y pa restante di 2021. E proyeccion pa lunanan di februari y maart ta cu pa februari ta wordo spera un total di 34 mil turista y pa maart un total di 42 mil turista. E proyeccion revisa pa februari y pa maart ta den linea cu e scenario conservativo y aki por conclui cu por cera e prome kwartaal di 2021 cu un proyeccion bao di e scenario conservativo.
A.T.A. ta sigui traha di cerca cu socionan pa asina ahusta/adapta strategia di comunicacion internacional ora ta necesario y pa entre otro mantene e sector bon informa y bon ekipa cu informacion pa brinda huespednan / futuro huespednan, pero tambe informacion pa nan propio planificacion y strategia.
A.T.A. kier gradici tur socio kende a bin ta traha incansablemente pa Aruba su turismo por habri bek. Ta subraya e responsabilidad colectivo y individual cu nos tin. Pa Aruba su turismo y su economia sigui recupera, ta importante pa nos carga e responsabilidad di keda practica tur e protocolnan stipula door di e diferente instancianan concerni. Asina Aruba por domina e casonan di Covid-19 y nos economia por bolbe florece.
