Metodologia y conocemento nobo relaciona cu desaroyo y sostenibilidad di oceano publica den “Nature Sustainability”
Futuro di desaroyo sostenibel den e Estadonan Insular Chikito den Desaroyo (EICD – SIDS) ta depende di mas cu solamente maneho di medioambiente. Segun un estudio nobo riba e metanan economico y social ta sumamente importante pa stimula desaroyo sostenibel di oceano den e Estadonan Insular Chikito den Desaroyo pa por logra e Metanan di Desaroyo Sostenibel (MDS –SDG) di Nacionnan Uni.
Un articulo (https://rdcu.be/chtQP) publica dia 25 di maart 2021 den Nature Sustainability ta propone un structura nobo pa e gobiernonan y agencianan di EICD – SIDS pa atende cu e Metanan di Desaroyo Sostenibel (MDS), basa riba un analisis particular cu ta un coproduccion di un team di investigado y gobierno di Aruba.
Titulo di e articulo ta “Aiding ocean development planning with SDG relationships in Small Island Developing States”, na Papiamento “Yudansa pa planificacion di desaroyo di oceano cu relacionnan di MDS na e Estadonan Insular Chikito den Desaroyo”.
Maske a visualisa tur e MDS-nan como relaciona cu otro ora a establece nan, tin bastante inseguridad ainda tocante con nan ta relaciona cu otro, p’esey planeamento con mester diseña y implementa maneho pa logra e metanan aki ta exigi un sistema gubernamental cu por guia e cobeneficionan y mitiga e diferencianan entre e MDS-nan. E investigacion ta uza e relacionnan entre e MDS-nan pa informa e structura cooperativo institucional pa aumenta e probabilidad cu ta logra e metanan di MDS, mientras ta reduci e probabilidad pa haya resultado desalinea y contraproductivo.
“Manera nos ta compronde, esaki ta e prome investigacion cu ta vincula analisis di e relacionnan entre e MDS-nan cu structura gubernamental cu ta relevante nacionalmente,” ta palabranan di autor principal dr. Gerald Singh, subdirector cientifico di Nippon Foundation Ocean Nexus Center.
E articulo ta duna diferente idea y un metodologia pa implementa e proceso di planificacion pa e Estadonan Insular Chikito den Desaroyo por alinia strategicamente e prioridadnan politico pa logra e MDS-nan, incluso lo siguiente:
- Turismo sostenibel ta contribui directamente na mayoria di e cobeneficionan di tur e MDS-nan na Aruba, pero turismo ta depende di reduccion di contaminacion/polucion marino.
- Sostenibilidad di oceano di e Estadonan Insular Chikito ta rekeri no solamente cambio di maneho economico y infrastructural, sino tambe cooperacion/asociacion internacional pa reduccion importante di cambio global manera impacto climatologico.
- Pa por probecha di e cobeneficionan di MDS pa promove desaroyo sostenibel di oceano, e agencianan social y economico mester hunga un papel critico, tin biaha mas cu e agencianan medioambiental.
“E tipo di estudio aki ta yuda Aruba cu su planificacion di desaroyo sostenibel. Como un estado grandi oceanico (Large Ocean State) Aruba ta depende na escala grandi di su economia di lama y ta trata di aumenta e beneficionan economico na un manera sostenibel. Manera ta indica den Aruba su Plan Strategico Nacional, Aruba lo uza e oceanonan y e propiedadnan natural di costa segun e Blue Economic Principle (e Principio Economico Blauw) di desaroyo sostenibel.
E investigacion tabata financia principalmente pa UNESCO. E otro autornan ta dr. Marck Oduber di Comision Nacional di UNESCO Aruba, dr. Andrés Cisneros-Montemayor di the Nippon Foundation Ocean Nexus Center y dr. Jorge Ridderstaat di University of Central Florida.
Comision Nacional di UNESCO kier a gradici Sr. Oduber cu tabata organisador di e workshop aki y tambe un di e autornan di e publicacion den e revista renombra Nature Sustainability.
