ORANJESTAD,Aruba
E weekend cu a pasa, durante un evento di ‘Vakantie Awards’, Aruba Tourism Authority (A.T.A.) a logra bay cu e premio mayor como e miho Oficina di Turismo di Hulanda.
Manera tabata e caso den 2018, A.T.A. a logra bay cu e titulo mayor y awo na 2020 a bolbe gana e titulo mas halto dentro di tres aña.
Vakantie Awards ta conoci como un premiacion importante den e negoshi di biahe. Anteriormente ta unicamente agentenan di biahe tabata e unico hendenan cu por a vota, pero desde 2017 e la bira posibel tambe pa usuarionan vota y asina expresa nan mes. Na Hulanda tin mas o menos un total di 30 negoshi di turismo dentro di e sector di biahe. “Nos ta masha honra y orguyoso cu pa e di dos biaha dentro di tres aña nos a gana e premio prestigioso aki como e miho oficina di turismo na Hulanda. Cu hopi entusiasmo, creatividad y amor pa nos trabou, nos ta purba crea interes entre e biahero potecial pa asina nan por scohe Aruba como nan siguiente destino di vacacion. Cu nos a gana e premio excepcional aki pa di dos biaha den un tempo asina cortico ta mustra no solamente e confiansa den nos oficina, pero tambe ta indica e eficaz di nos esfuersonan” segun A.T.A. Area Director di Europa, Sr. Tirso Tromp.
CEO di Aruba Tourism Authority, Ronella Tjin Asjoe-Croes a expresa: “Nos ta orguyoso di nos ekipo na Europa. Un ekipo cu ta traha cu dedicacion y cu ta eherce nan tarea no solamente pa e mercado di Hulanda, pero tambe pa e region di Europa den su totalidad. Un region importante, cu ta forma parti integral di Aruba su strategia di diversificacion. Pabien y danki na e ekipo completo.”