Segun un publicacion haci riba e website di Koninkrijksrelatie, entrante 2026, pues aki cuatro aña lo mester cuminsa bula avionnan eléctrico entre e islanan Hulandes den Caribe. Esaki ta parti di e plan di Minister di Infrastructura y Waterstaat Mark Harbers a bisa den e nota di maneho cu el a entrega na Tweede Kamer. E ta papia aki di vuelonan comercial entre Aruba, Boneiro y Corsou.
Pa 2030 mas cu mita di e biaheronan lo mester ta biahando den avionnan electrico y na 2035 biahamento etre e islanan ta solamente abordo di avionnan electrico.
Un investigacion cu e ministerio a laga haci, ta mustra cu e islanan aki ta perfecto pa pone avionnan electronico den uzo. E distancia entre e islanan ta cortico y tin suficiente biento y solo pa carga bateria di e avionnan. Ademas, e prome generacion di avionnan electrico cu denter di algun aña lo ta riba mercado pa loke ta capacidad ta igual na e flota existente di e aerolineanan local di Divi Divi y EZ Air cu ta transporta mayoria di e pasaheronan entre e islanan.
Avionnan electrico no ta solamente mas limpi y ta haci poco sonido, pero mas barata. E prijs cu e ta costa ta halto, pero ta saca e placa aki bek hopi lihe debi na e poco gasto di mantencion y e fuel cu e ta uza. Economistanan ta calcula tambe cu e tipo di avionnan aki lo baha prijsnan di pasashi.
E cambio aki ta forma parti di e maneho stipula algun aña atras caba cu ta bisa cu denter di algun aña tur biahe di 500 km mester wordo realisa den avionnan electrico.