Manera ta konosí, tur aña fin di ougùstùs Kaya Kaya Festival ta tuma lugá den kayanan di Otrobanda.
Organisashon di Kaya Kaya ta orguyoso ku ta bai selebrá e di 6 edishon dia 24 di ougùstùs benidero. Kaya
Kaya den su totalidat no ta solamente un festival pero un movementu ku tin su impakto riba desaroyo
sosial, ekonómiko, kultural i tambe riba e infrastruktura di Otrobanda. Durante di e kaminata, ku a tuma
lugá dia 26 di yüni 2024, huntu ku prensa i medionan di komunikashon, Kaya Kaya a laga esnan presente
mira e “Impact Report” di Kaya Kaya 2023 i duna un ñapa di lokual ta pasando i lo bai pasa durante e
dianan binidero den komunidat di Otrobanda i tambe pa ku e festival. Den transkurso di e dianan
benidero nan lo publiká e “Imapct Report, kaminda por lesa ki impakto i kambionan Kaya Kaya a trese ku
n’e den Otrobanda. E rapòrt aki ta bai wòrdu publiká riba nos páginanan sosial.
Durante e presentashon durante di e kaminata, a splika over di e “ Lessons Learned” di e aña pasa i kon
ta bai mehorá nan e aña aki manera entrada i “token”. Sigun e grupo tabata kana den e área di e
festival, por a mira entre otro inisio di drechamentu i fèrfmentu di e kasnan di Fundashon Kas Popular i
limpiesa den diferente áreanan kaminda e festival lo tuma lugá.
E kaminata a tuma lugá bou di guia di e 3 fundadornan di Kaya Kaya kual ta Kurt Schoop, Raygen
Zuiverloon i Clayton Lasten. Un festival ku a kuminsá organikamente ku e fundadornan i ku awor tin un
tim basta grandi ta asistí. Kaya Kaya ta un vehíkulo pa por realisá impakto duradero den Otrobanda. Riba
algun video ku a sali den medionan sosial djaluna último, por skucha e storia kon Kaya Kaya a kuminsá.
Durante e último 5 edishonnan di Kaya Kaya, a rekohé entre otro 400 kilo di shushi, 125 kas a wòrdu
restourá, mas ku 50 mural ku a wòrdu produsí kual ta hasi Otrobanda un distrikto di arte ku ta atraé
hopi turista. 74 “led lights” a wòrdu instalá, 14 kaya a wòrdu drecha i tambe tin 4 spòt di rekreashon.
Habitantenan ta wòrdu embolbí di e akshonnan tumá, paso huntu nan ta mehorá Otrobanda.
Dia 19 di ougùstùs 2024 Kaya Kaya lo ranka sali ku un Art Week den kua obranan di arte ku lo wòrdu
eksponé den diferente forma i un Saka Raton 25 di ougùstùs. Huntu ku esaki ta bai tin un programashon
amplio kaminda diferente artista lokal i di diáspora lo presentá. Keda pendiente.
