Otmar Oduber di plataforma PAIS ta para un rato keto riba e forma cu Parlamento di Aruba ta atende cu decisionnan importante pa PAIS Aruba. Tabata un berguensa grandi pa mira un parlamento di Aruba cu no por a uni su mes pa un defensor di e pueblo di Aruba, no pa un nombramento di un persona cu ta bay representa un gobierno of ta bay representa un partido, pero den e caso aki Aruba pa historia a marca na momento cu mester a nombra e prome Ombudsman defensor di pueblo di Aruba den su totalidad y parlamento di Aruba simplemente no por a haya su mes pa actua na un forma madura , profesional y definitivamente actua na un forma di integridad.
Un proceso cu mester tabata un proceso bunita cu ta un proceso cu ta haya un conseho di e colegionan mas halto di Aruba pa loke ta trata nombramento di un persona imparcial cu ta un defensor di e comunidad di Aruba cu mester defende tanto e pueblo como e gobierno den tur circunstancia cu ta existi a conduci na lekmento den parlamento riba nombernan di profesionalnan cu a aplica y cu hasta a pasa e proceso pa por wordo nombra y den e caso aki tabata tres candidato cu lamentablemente na nomber a keda saca afo pa motibonan politico den publico.
E situacion aki a conduci den cierto momento cu no por a ni sigui e consehonan cu tabatin pa loke ta trata e institutonan importante na Aruba cu a conseha parlamento riba e postulacion di e tres personanan. E mal comportacion di parlamento y e berguensa di e forma con parlamento ta traha y comporta su mes a conduci cu un di e candidato nan pa Ombudsman a retira su mes for di e postulacion pa ta defensor di pueblo como un Ombudsman.
Segun Otmar Oduber di Plataforma PAIS esaki a yega na un division caminda cu parlamento a yega naturalmente na un decision na final, pero ta di lamenta con henter e proceso den e caso aki a encamina siendo cu e reunionnan den CHA ta reunionnan confidencial cu parlamentarionan mester respeta.
Banda di tur cos Otmar Oduber di plataforma PAIS ta felicita Jurima Bryson cu e posicion di prome Ombudsman di Pais Aruba. Pero na mes momento ta mustra cu e Parlamento di PAIS Aruba ni na e momento cu mester presenta nombra y discuti y crea un unanimidad riba un defensor di pueblo pa Aruba ta mira un parlamento totalmente kibra , partidista , haciendo wega y na unda cu awo cu tur cos a pasa tur parlamentarionan ta sali pafo y ta critica e proceso. Tanto e parlamentarionan den gobierno y den oposicion , pero lamentablemente ta nan mes ta e protagonistanan pa e berguensa cu a tuma luga un biaha mas den parlamento.
Segun Otmar Oduber di Plataforma Pais por a tuma nota algun tempo pasa na dos ocasion cu parlamento no tabatin e curashi pa representa pueblo di Aruba y tuma un decision riba matrimonio di mes un sexo, pero a prefera di hunga wega politico pa no pasa un ley y un biaha mas atrobe ta mira cu un ley cu mester ta historico y importante y bunita pa e pueblo aki pa nombra un defensor pa e comunidad di Aruba un biaha mas politica ta wordo hunga.
