No por sigi cu e maneho unda contratonan ta keda secreto pa representantenan di e pueblo
Otmar Oduber ta considera cu a yega e momento na Aruba pa para cu politiconan cu ta kere cu por tuma decision, despues nan ta wordo libera door di Parlamento y consecuencia ta keda pa Pais Aruba.
Esaki por a wordo mira den e caso di e grupo Tofanelli cu a costa Pais Aruba miyones pasobra cierto politiconan a bay defende bagabunderia, a nenga di bay corte of pone otro hende responsabel. A prefera di laga Parlamento tuma un decision pa paga miyones na e grupo aki cu no tabata funciona na Aruba.
A mire tambe tambe den caso di Citgo caminda cu Otmar Oduber mes como minister nunca a bay di acuerdo pa firma e contract aki y Citgo a resulta di ta e mafia di mas grandi cu a tuma luga na e pais aki y e tabata e rason pa cual su persona a tuma e decision didistancia su mes for di partido AVP y baha como minister. El a prefera di para pa su principionan ya cu e no tabata di acuerdo cu esaki y otro cosnan mas; el entrega su retiro como minister a pesar di tabata e di dos votegetter di Pais Aruba. Tur esnan envolvi den e caso aki, esnan cu a firma cu Aruba, sea nan a bay cera of a fayece. Door di esey Pais Aruba a scapa di claimnan cu por a bin pa loke ta trata e contract ey.
Ministernan y nan respectivo Raad van Toezicht mester bay splica con por ta posibel cu tres contract ta wordo firma (Eagle LNG, AWSS y Serlimar) cu ta mara nos futuro generacion sin cu nan ta responsabilisa y sin cu un hende den Parlamento tin un copia di un di e contractnan aki of un di e proposicionnan aki y cu ta hole na algo cu no ta bon.
Partido PPA ta compromete su mes na momento cu pueblo dunanan e sosten pa drenta Parlamento, pa hams y nunca tipo di contractnan asina cu ta mara e pais, bolbe pasa sin cu Parlamento di Aruba tin inzage y por discuti riba esakinan. Esaki ta inclui contratonan cu ta ‘secreto’ debi na NDA cu tin cu wordo firma, pasobra no por existi un NDA cu ta obstaculisa e organo di mas halto di Aruba do por wak un contract cu ta wordo firma door di un gobierno cu supuestamente mester wordo controla door di e mesun Parlamento ey.
Pa tal motibo PPA ta propone pa den Parlamento crea un comision pa ley caminda un representante di cada partido representa den Parlamento lo ta den dje. Tur contract di largo duracion of cu ta riba e suma di 1 miyon Florin mester wordo gescreen door di e comision aki.
