Otmar Oduber durante conferencia di prensa a indica cu awo ta e momento pa San Nicolas. “Despues di 40 aña, por fin e vision cu nos tabatin, cu mi persona a inicia casi 10 aña pasa ta hayando su raisnan den e pueblo di San Nicolas y nos compromiso ta pa continua cu esaki, cu e plannan cu ya caba tey. Percura pa tin capital, percura pa tin inversion, percura pa tin maneho y leynan cu ta bay duna incentivonan pa hendenan di berdad tambe cuminsa inverti den San Nicolas y laga nos ta bon cla, refineria ta pasado”!
Plataforma Pais,como e Thinktank di PPA ta bisa cu San Nicolas a keda stagna pasobra no tin amor pa San Nicolas, no tin cariño pa san Nicolas, no tin un vision ni un plan.
Otmar Oduber ta puntra kico a tuma lugar pa San Nicolas den e ultimo 5 añanan? E ta bisa cu a priminti tur sorto di ‘valleys’, tabatin promesanan pa loke ta un refineria, a priminti companianan di gas, pero echo ta cu 5 aña a pasa bay, desde cu el a bandona politica, cu nada no a pasa na San Nicolas.
“Nos no mester inventa ningun wiel, rapportnan cu a wordo traha den pasado pa Price Waterhouse Coopers, rapportnan cu a wordo traha pa Aruba Investment Bank ta papia di e revitalisacion di San Nicolas, pa haci di San Nicolas e di dos capital turistico di Aruba como e cultural and heritage city y pa bin cu hotel na San Nicolas. A lucha pe y a logra bin cu e prome hotel pa San Nicolas pa asina e parti aki di nos isla por cuminsa disfruta un poco di e bolo grandisimo cu tin di turismo na Aruba y cu lamentablemente pa e ultimo 40 añanan San Nicolas no a sa di disfruta di dje”, Otmar a declara.
El a agrega cu e plannan tey pa sigui inverti den San Nicolas manera a haci den pasado cu a inverti den Promenade, den e proyecto di ‘murals’ cu e tabatin e honor di guia y cu awe ta haci cu turistanan tur dia ta den Promenade, den San Nicolas. Esey a cuminsa ora Otmar Oduber a presenta e vision pa haci di San Nicolas e di dos capital turistico di Aruba a traves di e cultura y herencia.
San Nicolas pa prome biaha den 40 aña cu Aruba ta biba di turismo, ta mira un desaroyo positivo; un hotel cu ta bay habri, empleo cu ta bay wordo genera y e ripple effect cu lo wordo genera manera entre otro, car rentals pariba, souvenir shopnan, tour operators, etc. Tambe e lo trece cambionan pa taxistanan cu lo por cuminsa core mas pariba, trahadornan por bay traha mas cerca di nan cas, no solamente den hotel, pero den tur facetanan cu a bay wordo crea door di e desaroyo aki, combina cu e parti di haci di e parti pariba di nos isla e atraccion cultural historico di Aruba.
“Mi tabatin e honor di habri 3 museo na San Nicolas y ultimamente mi ta tende cu atrobe no ta hayando e apoyo ni sosten. Nos mester evita cu e tendencia aki sigui sosode, pasobra si nan tabata na Playa of na Noord cu tur respet, di ripiente gobierno lo tabatin tur sorto di subsidio, lo por tabatin tur sorto di capital pa duna e fundacionnan di e museonan aki na San Nicolas. Lamentablemente awe mi ta scucha cu tin un cantidad di problema, retironan ta cay, museonan pariba di nos isla no ta hayando nan placa y awo ta e momento pa San Nicolas”, tabata palabranan di Otmar Oduber.
Otmar Oduber PPA : Awo ta e momento pa San Nicolas
