Despues di un periodo largo di evaluacion y consulta mi a tuma e decicion di re incorpora mi mes den politica activo di Aruba. No ta un secreto cu mi persona tin un pashon enorme pa e trabao cu mi a desplega den pasado y un entrada nobo den e arena politico no lo ta nada diferente. E pashon tey keto bai pero loke mas ta atrae mi persona pa regresa den e servicio publico ta e hecho di a experencia, durante casi cuatro aña, e dificil cu e ta pa e sector priva sobrevivi. Y aki mi no ta papia unicamente di e comerciante y inversionista nan pero tambe e sector laboral, osea nos hendenan cu practicamente no por mantene cabez riba awa pa motibo di e costo haltisimo di bida. Comerciantenan practicamente no por hala rosea pa motibo di “cost of doing business” y “redtape (burocrasia)” cu tin e gran mayoria horca. Nos comunidad, nos empleadonan no por “keep up” mas cu e costo halto di bida riba nos Isla. Tur cos a bai “sky high”, a bira carisimo. Nos pensionadonan ta worde “castiga” literalmente riba tur tereno sin haña un “break”, mientras cu e unico decicionan cu ta worde tuma ta pa mira kon por saca mas placa di e comunidad, sin tin un VISION kon pa crea mas entrada sin pone e peso di esaki riba nos mes hendenan. Empleadonan publico balente y particularmente nos docentenenan ta esnan cu mas a worde descurasha durante e ultimo decada aki. E amargo experiencia di a worde y te ainda ta worde persigi inhustamente a ponemi realiza, pa kon doloroso cu e por tawata y ta, cu nos hendenan no ta satisfecho cu e in-sinceridad y des-honestidad di nos politiconan, “ Es cu obra cu Fe, Speranza y Amor lo por cana semper frenta na laira, paso e Berdad semper ta alcanza e Maldad”
Nos Pais ta carece di DETERMINACION, toma di decicion cu ta haci un diferencia positivo den bida di nos hendenan. Pa tin determinacion mester tin curashi “cohon” pa tuma decicion cu ta na beneficio di e mayoria y no di un grupo. Aruba definitivamente ta carece di un VISION en comun, cu ta worde carga pa un mayoria pa logra bienestar di henter nos comunidad. VISION cu mester worde ehecuta cu DETERMINACION pa henter nos comunidad, no djis gobierno, sino en conhunto cu gremionan en general. Un VISION en comun, carga cu DETERMINACION sigur lo duna fruto na momento cu esakinan worde ehecuta cu ACCION nan hunto, como un nacion. Como un PAIS ! Di e forma aki nos lo por recobra e confianza di Hulanda y no permiti pa otronan tuma decicionnan pa nos, poniendo nos Pais bao un preshon inhusto. Mantene nos soberania dentro di reino hulandes cu e independencia cu nos mes a scohe pe conforme nos Status Aparte. “Mi ta sigur cu e pueblo kier para tras di un causa nobo y crea un PAIS unda e pueblo Arubano por mantene e Status aki cu tanto nos a lucha pe”, asina Otmar Oduber a termina su comunicado di prensa anunciando su regreso den e arena politico.
“Mi compromiso desde awe un biaha mas ta pa yuda crea e VISION aki y percura cu e por worde ehecuta atravez di ACCION cu lo mester worde carga cu DETERMINACION. Mi a haci esaki exitosamente den pasado y ta convenci cu lo por haci esaki un biaha mas cu e conviccion di por uni e isla aki tras un ideal en comun cu no solamente gremionan den nos comunidad pero tambe haciendo un jamada na politica engeneral pa uni tras e bienestar di henter Aruba”.
1 comment
[…] Source link […]