Esey ta ironia di e caso aki, Otmar Oduber a bisa den Corte. Tur su placa y di su famia ta na Aruba. A uza placa pa inverti den Bochincha. Y awo cu Bochincha kier habri un cuenta, ta nenga. Y solamente pasobra e ta director di e compania y ta un sospechoso pa Ministerio Publico.
Pero e cuenta di banco e mester pa haci transaccionnan manera pago di belasting, su trahado- y proveedornan. Tanto e Abogado como Otmar a trece dilanti cu e banco a wanta nan na liña y a lanta e impresion cu nan lo habri un cuenta pa nan. Tur documento of splicacion cu a pidi cada biaha a duna nan. Nunca a bisa nan cu definitivamente no ta haya e cuenta, inclusive un siman prome cu apertura ainda tabata den reunion cu e banco.
Mirando cu ta tardando, a dicidi pa mientrastanto chek un otro banco. E otro aki si a bisa mesora cu no por habri un cuenta pa nan. “Mi cliente mester di un cuenta pasobra ta haya hopi placa cash. Awendia no por cana cu e placa aki rond,” abogado di Bochincha, mr. Kuster a bisa.
A lanta Bochincha Container Yard na juli aña pasa y el a habri su portanan dia prome di december. Henter e periodo ey Oduber ta bisa cu e tabata bezig pa habri un cuenta. A scoge pa Aruba Bank pa motibo cu e tin un relacion di casi henter su bida cu e banco, mescos cu su casa y yiunan y demas famia. Pakico bay otro banco, si tur e placa di nan ta den Aruba Bank, inclusive esun cu a inverti den Bochincha y otro negoshinan di famia.
E banco a obliga nan haci transaccionnan cash y cu despues ta wordo cuestiona. Manera un pago haci na Oduber door di Bochincha pa trabou di Consultancy prome cu el a wordo lanta.
E argumento di e banco pa no habri cuenta ta pasobra Otmar Oduber, kende ta director di Bochincha ta un sospechoso cu tin acusacionnan contra dje. Esaki e no ta compronde pasobra den e BCY tin 10 negoshi y tur tin cuenta di banco, trahando cu ne.
Banco su Abogado a bisa cu e ta un riesgo demasiado grandi cu nan no kier tuma. Nan tin cu cumpli cu reglanan estricto di Banco Central di Aruba, di contra labamento di placa. Si un cliente nobo ta trece cierto riesgo cu ne y duna mal publicidad na nomber di e pago, nan mester nenga di tuma e cliente. No ta core riesgo di haya un boet. Ni casino ni negoshi catochi no tin cuenta di banco pa motibo di e control profundo cu esaki ta trece cune.
Ta berdad, e abogado a bisa, cu Oduber y su famia tin cuenta cu nan pero tur esaki ta data di prome cu maart, 2020.
Dado momento Hues a puntra Oduber si e ta bay di acuerdo pa habri un cuenta cu condicion, esta cu si nan conden’e banco ta cera e cuenta di biaha. E no a duda ni un rato y a bisa SI. “Mi ta bay di acuerdo pasobra mi sa cu mi ta inocente,” el a bisa.
Dia 3 di februari awo tin decision den e caso.