“Elimina impuesto, percura pa nan haya nan remedi bek y aumenta nan entrada ta e prioridadnan”, asina e
Secretario General di PPA, Otmar Oduber durante conferencia di prensa a elabora riba e ultimo encuentronan cu tabatin cu organisacion di pensionadonan, OPPA, SVB y AZV durante cualnan a trata principalmente e tema di nos grandinan
Manera ta conoci, pa mas o menos un aña caba, Plataforma Pais a bin ta trahando riba e tema aki y a trece un cantidad di informacion den comunidad, cual a wordo gebackup tambe cu rapportnan di tanto Oficina Central di Estadistica,CBS, como tambe di Banco Central di Aruba. Esakinan a mustra cu e cantidad di pensionadonan na Aruba ta hopi grandi y den e grupo aki tin otro substancial, di mas di 14 mil pensionado cu tin un entrada di menos cu 800 Florin y hopi di nas cu un korting cu ta haci cu nan entrada ta mucho menos cu 800 Florin pa luna.
Mientras tanto 21 miembro di Parlamento no a para un rato keto, no a presenta ni un ley, no a busca un solucion, no a yama gobierno aden pa papia ria un echo cu no solamente tabata bisto, pero tambe documenta door di instancianan manera OPPA cu diferente biaha a sali publicamente y a dirigi un cantidad grandi di carta na gobierno. Lamentablemente no a logra nada, no a trece ni un solucion pa nos grandinan durante e ultimo casi 4 añanan ni di parti di gobierno ni di parlamentarionan cu awe ta preparando pa bay eleccion.
“Nos di nos banda a presenta solucionnan pa nos pensionadonan, nos a bisa cu definitivamente mester coregi e situacion”, Otmar ta indica. E proposicion pa logra esaki ta:
- Elimina impuesto cu ta wordo paga door di nos grandinan
- Elimina tur impuesto ora yega edad di pension
- Percura pa nos grandinan haya nan remedinan bek cu tanto nan tin mester di dje y cu lamentablemente pa falta di vision y perspectiva a kita for di e lista positivo
- Percura pa entrada di nos grandinan wordo aumenta. No ta cuestion di por of no por, ta cuestion di busca e manera di por haci esaki pasobra no ta husto pa ningun pensionado biba di e entrada cu nan ta bibando di dje, gran cantidad, 1 di cada 4 di nan den pobresa.
Banda di e 4 puntonan ariba menciona, Otmar Oduber a indica tambe cu mester baha e prima di AZV y AOV pa esnan cu ta pagando e maximo, cual no ta husto tampoco. Tin gruponan cu ta pagando mas cu miembronan di Parlamento ta paga na prima pa aña pa AZV, cual ta un inhusticia enorme.
Awo cu ta tempo di campaña, despues cu durante 4 aña no a scucha ni un politico papia riba e topico aki, Otmar ta convenci cu lo bay scucha un cantidad di nan ta bay papia riba pensionadonan y di ripiente ta bay tin un cantidad di solucion.
“Tin partidonan cu awe ta purba trece promesanan pa pone e fondonan di AZV y SVB na peliger bisando cu e fondo aki tin un reserva lubidando cu nan no ta un banco. E pensamento aki ta totalmente robes pasobra SVB corectamente ta percura pa tin e fondonan necesario pa sigura e pago pa e proximo 10-12 aña y evita cu tin problema den futuro, sea subiendo edad di pension atrobe of aumentando e prima di e aseguradonan y esaki no por tuma lugar”, Otmar a duna di conoce.
