Jeffrey Levenstone Eks diputado i miembro di Raad ta konsidera e reunion di Konseho Insular di ayera nochi komo un pelikula di horor den kwa pensamentu maligno y sentimentu di vengansa a prevalese riba pensamentu progresivo y sentimentu siviko, konforme e responsabilidat noble komo representante di pueblo. Un pelikula di horor orkestra y dirigi pa Sr. Abraham di ( frakshon Demokrat) huntu ku su sosio(a) Sra. Cofie (frakshon Coffie). E meta di e reunion aki, ku por sierto a keda konvoka komo punto di urgensia sin ku esaki tabata algu urgente (ojo Griffier), tabata pa obstakulisa esfuersonan di gobiernu pa trese Alivio pa pueblo, den e tempu ekonomikamentu ferfelu ku nos ta bibando.
Tabatin puntonan di agenda riba mesa ayera nochi, ku tabata nesesario pa finalisa pa asina gobiernu por a yuda suidadanonan ku mester di ayudo pa drecha nan dak di kas den kuadro di planan sosial eksistente, tabatin re-alokashon di medionan pa yuda trahadornan di selibon NV, ku tabata hopi den notisia ultimamente, tabatin re-alokashon di medionan pa start ku e proyekto di transporte publiko ku ta yuda pa saka barionan aleha foi isolashon y pa konekta nan ku Skol, Ofisinan di gobiernu, Misa, y kanchanan di Deporte, tabatin re-alokashon di medionan pa yuda ku proyektonan di deporte y desaroyo di nos talentonan lokal y asina mi por sigi menshona.
Ta remarkable ku ta net e representantenan di pueblo, den e kaso aki Sr. Abraham y Sra Coffie ku a bai papia ku trahadonan di Selibon NV, ku a primintinan ku nan lo hasi nan maksimo esfuerso pa yuda pero ku na e prome okashon ku berdaderamente nan ta wordu yama pa yuda, ta krea un bochincha pa kita enfoke foi e pueblo den un intento pa sasia nan set di vengansa kontra gezaghebber y kontra pueblo. Strobando asina pa Selibon nv por risibi e yudansa ku nan ta warda ku zelo. Bisa A y Hasi B, esaki ta mustra falta di integridat y ta stroba pueblo di por konfia su representantenan.
Naturalmente ta asina ku nan a hinka e pensamentu maligno aki den un bachi super bunita. Pero nan mester kompronde ku nos ta mira dwars dor di e bachi bunita ei. E ta simpel; si bo ta hanja ku tin intimidashon di trahado y ku tin kultura di miedu den e aparato, anto bo ta propone un instansha independiente pa fungi komo organo di keho kaminda trahadonan anonimamente por entrega nan keho. Hasiendo esaki bo ta duna un aporte na solushon di e problema y ofrese yudansa na e trahadonan pa kwa bo tin tantu prekupashon. Fasil tog, no ta nesesario pa kima of trata na asesina karakter di ningun hende.
Sea konsiente ku Boneiru ta para dilanti di un krusada krusial pa ku su futuro. Esaki ta nifika ku Boneiru awor mas ku nunka mester di tur su kabes nan huntu y den e mesun direkshon pa nos por yega Roma. E elekshon parlamentario ku ta plania pa Mart 2023, ta unu importante pa Boneiru. Ta imperativo pa tur Partido ku ta pensa pa ta den kontienda, tuma tempu y traha nan plan kon pa hasi Boneiru miho. Si bo ta di opinion ku e gobiernu aktual no a funshona bon, bin splika pueblo kon abo si por hasie miho. Ta esaki pueblo ke tende di boso y no e disku raya di semper, ku ta kuminsa ku korupshon y kaba ku korupshon. Ni buriku no ta dal su pia mas biaha na e mesun piedra. Pueblo ta kansa di e mesun storia, si bo ta di opinion ku tin korupshon, anto bo sa na unda bo mester ta. Pero ora ta trata gobernashon,usa tur tempu ku boso tin pa duna aporte positivo na Boneiru y su futuro. Ta esei ta bo(so) funkshon, y ta esei pueblo ke tende di boso.
No ta nesesario pa mancha nomber y asesina karakter di ningun hende pa logra bo meta. Trata na logra bo meta riba bo propio meritonan y stop di trata na kaba ku otro. Nos a hasi esaki lo sufisiente. Ta basta awor. Samina bo konsenshi realisa ku bo(so) akshonan ta tacha Boneiru. Realisa ku ya kaba nos ta relativamente tiki. Di e tiki nan ei, ta un man yen tin e pashon pa sirbi pueblo. Laga nos no kaba ku nan y nos mes.