Ta parce cu ta conoci caba cu Elio Livi lo no bay haya mucho castigo pa e delito cu el a comete di opera un casino di forma ilegal. Esaki pasobra autoridadnan a permitie pa bandona Aruba, mientras cu e tin un caso pendiente den Corte.
Por corda ainda cu den periodo di pandemia, ora cu e delito aki a wordo cometi, Livi a cuminsa opera un casino ilegal, estilo di mafia Italiano. Esaki a sosode durante casi un aña largo. Y awo cu e mester presenta den Corte, a resulta cu e no ta biba mas na Aruba y e citacion di dje no a yega den su man.
Loke ta haya mas straño di loke por a compronde di e caso aki ta cu Ministerio Publico (fiscal) tin solamente un acusacion contra dje, esta di a maneha casino di forma ilegal.
E gran pregunta ta con por ta posibel cu tin solamente un acusacion contra dje. E homber aki mester a suta basta placa durante e un aña cu e casino ilegal tabata den operacion (ora cu tur otro casino mester a cera nan portanan). Sin cu niun dia el a declara algo di e entradanan aki na Departamento di Impuesto.
Awo pa un tecnicalidad, por poco a perde e caso aki tambe. Awo Hues a duna OM e chens pa saca un citacion nobo pa su adres cu ta supuestamente na New York. Esaki ta e adres nobo cu tin para den e documentonan di e caso. Ta falta so cu ora di entrega e citacion na New York, e no ta biba eynan mas.
Lo ta bon pa OM revisa e caso un biaha mas y mira ki otro acusacion por pone contra e homber aki, evasion di impuesto. Cualkier ciudadano di Aruba cu haci algo asina, lo haya un acusacion asina contra dje cual no a sosode cu Livi, kende ta amigo di personanan conoci den comunidad di Aruba.
E homber aki, cu ta Venezolano pero por drenta Merca pasobra e tin e nacionalidad aki tambe, tabata envolvi den varios proyecto na Aruba, pero cualnan nunca a keda realisa. Esaki ya caba ta un sospecho cu un hende no ta preocupa di “perde” asina hopi placa y keda trankil.
Awo ta keda na autoridadnan pa percura cu e por haya su citacion pa presenta den Corte. Pero esaki mester ta cu acusacionnan cu realmente ta ilustra e delito cu el a comete.
