Jacco Vroepop, director di dr. Horacio Oduber Hospital, den un conferencia di prensa a splica cu nan ta den proceso pa mustra instancianan concerni cu no por baha gasto den cuido di salud. Mientrastanto a haya nan mes na mesa cu e sindicato ABV cu a bay den accion den oranan di mainta. Miembronan ta disgusta cu nan mes entrega 5% y mester traha mas ora. Hustamente nan di cuido ta frontliners den e pandemia aki.
E director a splica tur e proceso cu el a bin ta haciendo. A reuni siman pasa ainda cu tur e stakeholdernan den cuido na Aruba, pasobra ta consciente cu na e momento aki no por corta gasto den e area aki.
A sinta na mesa y despues di deliberacion, den cual sindicatonan tambe a participa, a yega ne conclusion cu mester manda un carta pa Gobierno di Aruba, Parlamento, pero tambe esnan na Hulanda, pa mustra cu den tempo di Pandemia no por baha gasto den cuido. Esaki ta algo incomprendibel. Pues e ta bisa nan ta bezig, pesey no a spera e accion di sindicato ABV.
E president di sindicato mes a bisa cu e miembronan lo reanuda trabou ya cu nan ta mesa pa yega na un acuerdo. Pero loke nan kier mustra riba dje ta cu na Corsou no a entrega e 12.5%. Ta na Aruba so esaki a tuma luga. Na Hulanda e trahadonan den cuido no a entrega. Al contrario a haya un bonus. Aki na Aruba ta pidi a traha extra y ta baha salario. Esaki ta loke nan no kier. Den Pandemia bo mester tin esnan cu ta atende cu e pashentnan den un estado trankil y concentra riba nan trabou. Nan ta esnan mas facil pa wordo contagia, mirando tur e pashentnan cu nan ta bin contacto cu nan.
Awo e sindicato y hospital lo sigui cu e deliberacionnan mayan hunto cu Mediador pa mira si ta yega na un acuerdo.
Operacion di hospital ta normalisa y sindicato ta sinta na mesa cu gerencia
