OM:Miembro di Kustwacht condena den caso Watapana

Corte den Prome Instancia a dicta sentencia awe contra e sospecho G.R.B., miembro di Kustwacht, den e
caso penal conoci bao di e nomber ‘Watapana’.
G.R.B. a wordo condena pa un castigo di prison incondicional di 8 aña pa complicidad den participacion
den actonan di preparacion pa importacion di cocaina y marihuana, complicidad den trafico di
personanan, maluso di funcion, violacion di secreto di trabao y participacion na un organizacion criminal
den e periodo di prome di september 2022 te 9 di september 2023. E trafico di persona di 27 di april
2023 tabatin un morto como consecuencia. Den e caso ey, cuatro otro sospechoso a wordo condena
anteriormente pa castigonan incondicional.
Como castigo adicional Corte a kita e derecho pa ocupa e cargo di miembro di Kustwacht/ambtenaar di
G.R.B. pa e duracion maximo di 13 aña. Huez a dicta den su sentencia cu G.R.B. a defrauda e confianza
den un ambtenaar di tal manera cu no tin lugar pe mas den servicio publico durante e periodo
menciona.
Watapana a cuminza na februari 2023, tempo cu Landsrecherche a start cu un investigacion penal
tocante funcionarionan di Kustwacht posiblemente corupto. G.R.B. tambe a bira obheto di investigacion
esten.
Kustwacht ta proteha awanan teritorial di Aruba y, entre otro, tin e tarea di combati delitonan manera
esunnan pa cual e sospechoso a wordo condena. Ministerio Publico ta tuma G.R.B. severamente na
malo cu e como miembro di Kustwacht a coopera cu, entre otro, contrabando di hende y droga riba
lama. Su actitud durante e proceso den Corte a demostra un gran falta di geful di responsabilidad y
comprension di e culpabilidad di su actonan.
Corte ta tuma e sospechoso na malo cu e, cu su actonan, a viola gravemente e confianza cu Kustwacht
tabatin den dje y a viola gravemente su deber di confidencialidad (su geheimhouding). Di miembronan
di Kustwacht ta ser spera integridad y honradez, no cu nan ta perhudica funcionamento di Kustwacht y
di Pais Aruba. Integridad di un ambtenaar ta un di e pilarnan fundamental di e Estado di Derecho.
Dor di duna informacion na contrabandistanan, el a pone seguridad di su mes coleganan posiblemente
mas na peliger ainda. Ademas su accionnan a contribui na transporte di droga, negoshi di droga y
traficacion di hende, delitonan cu ta trece riesgonan serio cu nan y ta representa peligro grandi pa
Aruba.