Ombudsman a bay Corte Constitucional pa cuestiona e condicionnan di Hulanda

Corte Constitucional di Sint Maarten, riba diabierna, 20 di augustus, a trata e caso di Ombudsman contra Gobierno di Sint Maarten. Esaki tabata relaciona cu adaptacion di tres ley, basa riba exigencianan di Gobierno di Reino pa Sint Maarten por ricibi apoyo financiero relaciona cu e pandemia di COVID-19.
E condicionnan general imponi specificamente pa Sint Maarten, Corsou y Aruba ta como lo siguiente: reduccion di e pakete total di salario pa miembronan di Parlamento y Minister cu 25%; igual pa ambtenaar, empleadonan di Gobierno y empleadonan den sector semi-publico cu 12.5%; y poniendo un blafon pa ehecutivonan den sector semi-publico na 130% di salario di Prome Minister.
E base legal pa implementacion di e condicionnan ey ta formula den tres ley local cu ta wordo cuestiona door di Ombudsman.
Ta trata di e leynan: Temporary National Ordinance COVID-19 Reduction Package of Employment Government Workers; Temporary National Ordinance Adjustment Remuneration Package Person Charged with Political Authority; Temporary National Ordinance Standardization of Top Incomes and Adjustment Package of Employment Conditions (semi) Public Sector.
Ombudsman ta cuestiona e compatibilidad di e leynan cu Constitucion di Sint Maarten, principalmente si e ta conforme articulonan 15 y 16 di Constitucion. Ombudsman tambe a referi na articulonan 19 y 61 di Constitucion.
Ombudsman a pidi Corte Constitucional pa anula e leynan menciona completamente of parcialmente, y na opinion di Gobierno, no mester honra e demanda aki, of rechas’e.
Durante di e audiencia, e Huesnan a pidi informacion adicional di ambos banda. Na cierre di e audiencia, presidente di Corte Constitucional Hues Jacob “Bob” wit a bisa cu Corte lo bay evalua tur argumentonan treci dilanti door di ambos banda y ta trata di yega na un decision den un tempo husto.
Corte Constitucional, e unico den Reino Hulandes, ta evalua e constitucionalidad di e provisionnan di e ley. Solamente Ombudsman por cuminsa un procedura den e Corte aki.
E presentacion verbal door di Gobierno a wordo atendi door di Abogado R.F. Gibson Jr. Y di banda di Ombudsman, tabata Abogado J. Rogers. E tabata un caso cu a dura basta largo, for di 9.30 di mainta te cu 3.30 di atardi. E corte ta consisti di tres Hues y tres hues reemplasante, kendenan ta wordo apunta pa un periodo di 10 aña. Y nan contracto por wordo renoba solamente un biaha.
Prome Minister Silveria a bisa cu “Gobierno ta spera e veredicto y lo respeta e decision di Corte, manera Constitucion ta bisa. Gobierno a bay di acuerdo cu e condicionnan di Hulanda basta cu nan no ta en pugna cu ley y Constitucion. E posicion di Gobierno aworaki, unda salario, subsidio y necesidadnan vital di e pais por ta na peligro, incluso e parti di subsidio di salario di esnan cu ta trahando menos ora y cu nan doño di trabou no tin forma pa paga nan. Esey ta e realidad y si tabatin otro opcion disponibel e momento ey, sigur lo a haci uzo di esey.”
E mandatario a bisa cu en realidad ainda ta busca un forma pa e 12.5%, hunto cu sindicatonan. E espacio aki Sint Maarten a haya despues cu Ombudsman a hiba e caso Corte Constitutional; un proceso poni den e sistema hustamente pa test constitucionalidad di nos leynan. Nos ta spera e veredicto pa yega na un solucion y sigui dilanti,” Prome Minister Jacobs a bisa.