Diabierna 30 di juni Omar Boekhoudt a celebra su 45 aña den servicio di sector publico na Departamento di Asunto Social (DAS). Bou di e dushi ritmo di steelpan, DAS a celebra Omar su 45 aña den servicio, cual ta haci Omar e trahado cu mas hopi aña den servicio na DAS.
Omar a cuminsa traha na DAS dia 1 di juli 1978 y durante su 45 aña, a sa di brinda su granito di arena den desaroyo di e comunidad di Aruba. Durante su trayectoria largo den DAS, Omar a traha cu hopi amor y dedicacion. El a dedica su bida na yuda hendenan menos privilegia den nos comunidad y brinda nan e asistencia cu nan tabata merece.
Durante e 45 aña di su servicio, Omar a presencia hopi cambio y desaroyo den DAS. E la presencia despues di Aruba su Status Aparte, DAS su prome director te cu esun actual, diferente coleganan cu a bini y bay y varios coleganan cu a keda den memoria y cu awe no ta na mundo mas. Pero den tur momento, Omar a keda firme den su compromiso cu su trabou.
Omar su dedicacion y amor pa su trabou ta un berdadero inspiracion pa otro. Su entusiasmo, persistencia y lealtad ta cosnan cu ta causa admiracion. Awe, DAS henter ta stima y aprecia su contribucionnan duradero na e Departamento y e comunidad di Aruba.
DAS ta orguyoso di tur e logronan cu a wordo logra hunto cu Omar. Su conocemento y compromiso pa sirbi e comunidad y su coleganan lo keda pa semper den nos memoria. Awor, e momento a yega cu Omar lo retira pa disfruta di su pensioen. DAS ta desea Omar un dushi periodo di descanso bon mereci y hopi felicidad den futuro.
Den nomber di Departamento di Asunto Social, nos ta duna un danki special na Omar pa su 45 aña di servicio sobresaliente. Nan lo keda den nos recuerdo y nos ta spera cu su amor y dedicacion pa su trabou sirbi como inspiracion pa e futuro generacion.
