Departamentu di Inspekshon di Asuntunan Sosial i di Labor (SZW) ta investigá máluso di e sosten ku ta duna empresarionan na Hulanda Karibense en konekshon ku e krísis di corona. Den por lo pronto shete kaso, Ministerio Públiko BES ta bai ofer na prosedimentu penal. E kasonan tin di aber tantu ku e Areglo di Emergensia di SZW, komo e Kompensashon di EZK i ta okurí riba tur tres isla. Ta spera e promé kasonan den korte na mei 2021.
A introdusí e Areglo di Emergensia di SZW i e Kompensashon di EZK na komienso di e krísis di corona pa sostené empresarionan na Hulanda Karibense den nan gastunan di salario i gastunan fiho. Aproksimadamente 700 empresa ta hasi uso di e areglonan di emergensia ku unidat SZW di RCN ta ehekutá.
Si tin señal di uso inkorekto di e areglonan, unidat SZW di RCN ta tuma kontakto ku e petishonario. Si resultá ku a paga di mas, hopi biaha den bon konsulta ku otro, ta deskontá òf paga bèk e montante. Si deliberadamente a duna informashon inkorekto òf a tene informashon atras, ta apliká lei penal. Por ehèmpel den kaso kaminda dunadónan di trabou ta risibí kompensashon di gastu salarial pero no ta paga nan empleado esaki. Òf si ta risibí kompensashon pa empleado ku no ta den servisio mas serka nan. Tambe OM BES ta aktua den kaso kaminda a duna sifranan di volúmen di benta muchu haltu. Pa awor no lo ofresé areglo.
For di komienso tabata kla ku tabatin riesgo riba máluso di e areglonan. Ta otorgá e sosten di corona a base di informashon ku e petishonario yena. E ta firma ku e informashon aki ta kuadra. A skohe pa e método aki e tempu ei, pa e sosten por yega serka e kompanianan afektá mas lihé posibel. E método ta rekerí integridat di e petishonario. Na momentu ku nan situashon kambia kompará ku nan situashon na momentu di aplikashon, kompanianan mester entregá un formulario di kambio. I si nan ta sospecha di ta risibí kompensashon eróneamente, nan mester mèldu esaki
