Despues di dos siman di inval riba casinonan clandestino den edificio di Dakota Shopping Paradise di Arends, y edificio di Zenega Corp., na Wayaca, no tin mucho informacion riba desaroyo di e caso aki. Loke si por a compronde ta cu mientrastanto no tin ningun persona deteni mas.
Manera por corda, pa algun tempo caba tabata un secreto publico operacion di casinonan clandestino, cu a bira mas popular durante e temporada di pandemia. No solamente husticia tabata haya señalnan pero tambe Departamento di Impuesto. Finalmente a logra den un operacion den oranan di atardi drenta dos adres unda esakinan tabata opera.
Durante e operacion a confisca henter e administracion pero tambe a bay cu cahanan fuerte, di cual, segun informacion ricibi for di Ministerio Publico (OM), un di nan no a wordo habri ainda pa mira su contenido.
Na mesun momento tin un persona cu a wordo deteni, pero cu mientrastanto a wordo laga liber pendiente investigacion.
E investigacion den e caso aki ta concentra riba operacion di casino ilegal y labamento di placa. Pues ta concentrando riba esnan cu ta tras di e operacionnan aki. OM a bisa cu a recoge prueba cu ta mustra cu tabata bende alcohol, sinembargo no tin indicacion ainda di prostitucion, manera informacionnan cu tabata circula. Doñonan di edificio no ta enfoke di e investigacion aki.
Durante e investigacion a confisca un suma di placa tambe, cu autoridadnan no kier divulga. Pa esaki a envolvi Afpakteam, cu ta consisti di entre otro OM, KPA, Aduana, Marechausee, Meldpunt (MOT), FIOT (Fiscale inlichtingen en opsporingsteam) di Belastingdienst, RST, Kustwacht.
Tur placa confisca den tipo di operacionnan asina ta bay na final pa Fondo di Combatimento di Criminalidad (Criminaliteitsbestrijdingsfonds). Sinembargo OM ainda no por divulga cuanto placa a confisca, pa motibo cu un di e cahanan fuerte no a wordo habri ainda.
Den pregunta haci na OM, a informa EA News cu ainda e investigacion ta andando. E ta un proceso cu lo tuma su tempo. Awo ta analisando tur e informacionnan ricibi y materialnan confisca, entre otro e administracion. Na final Recherchenan ta hinca tur esaki den un procesverbaal cu ta bay pa Fiscal cu ta atende cu e caso. E funcionario aki, basa riba contenido y pruebanan disponibel lo dicidi kico lo bay haci cu e caso.
Casinonan ilegal manera e dosnan aki no ta algo inusual na Aruba. Pa hopi aña caba bou di pueblo ta conoci sitionan unda cu tin gamblemento ta tuma luga, pero no asina sofistica manera e dosnan aki descubri door di autoridadnan.
