Awe grupo di taxista tabatin reunion cu comision di transporte publico unda cu presidente di e comision ta Raymond Kamperveen. Na salida di e reunion por a combersa cu sra Linda Orman cu ta e vocero di e grupo di taxista y ta duna di conoce nan como taxista a keda scucha y cu a haya e oportunidad di vocifera tur locual cu ta reina den transporte publico na Aruba, pero specialmente den e ramo di taxi.
Importante ta pa e grupo cu nan a keda scucha y nan como parlamentario por a tuma nota di tur e preocupacionnan cu tin na pia di trabou. Tambe a vocifera maneho cu e minister ta tratando di bin cu ne kico ta encera pa e taxistanan. E reunion a dura mas cu dos ora y esaki ta e tipo di dialogo cu a spera di minister Ursell Arends, pero lamentablemente minister Ursell Arends nunca a atende cu e taxistanan riba e problematica cu tin den e departamento di transporte na un manera husto.
E mandatario a yama e grupo pa mustra e investigacion cu a tuma luga di universidad di Aruba y despues a yama e grupo un biaha mas pa scucha su agenda cu ta e resultado di universidad di Aruba y di eynan e mandatario a saca un MB tocante con por bisti na momento cu ta core taxi. Despues di esaki nunca mas minister di transporte Ursell Arends no a duna atencion na ne grupo di taxista.
Awor aki e grupo di taxista ta contento cu otro instancianan manera e comision di taxista den parlamento ta esun cu ta dunando e grupo di taxi atencion, un paso y actuacion cu mester a tuma luga di minister arends for di prome dia. Pero a dies bin cu dos MB y ainda ta nenga di para nan of tuma un “afkoeling” periode pa por sinta na mesa y papia.
Segun Linda Orman Minister Ursell Arends no kier duna boluntad y ta keda para cu e no kier para e dos MB nan y e no ta revoca nada, esaki ta un actitud cu taxistanan cu na mes momento ta ciudadanonan di Aruba ta lamenta , siendo cu e grupo di taxista ta hayando oido di tur hende unda cu nan ta compronde e situacion na momento cu ta duna un splicacion pero lamentablemente e minister mes ta keda riba su cabay y riba su trono.
E grupo di taxista ta hopi habri unda cu ta indica cu e puntonan cu ta na voordeel pa bin cu cambionan no ta problema , pero tanten cu e puntonan ta den nadeel pa e taxistanan esaki no ta wordo acepta y e dos puntonan ta na nadeel y aki ta caminda cu e taxistanan lo keda lucha y pidi husticia.
Mirando e situacion aki Linda Orman ainda no ta compronde e motibo dicon minister Ursell Arends kier bin cu e dos MB nan y ta bin cu un punto cu ta perhudica y no kier cambia esaki tampoco. Loke cu mester ta bon cla hamas un MB por bay contra di un ley, si e ley ta bisabo cu e landsverordering cu ta mas halto y ta indica bo con bo mester cana, asina mester cana e caminda pa e maneho y no otro manera, pero e minister kier cambia e maneho full contrario di e landsverordering.
Minister a menciona cu tin e deseo di introduci un comision independiente , pero taxistanan tin un landsbesluitcomessie di transporte dicon e mandatario no kier uza esey ? e ta den ley caba. E ta bisa caba kende tur tin e posicion den e comision aki y na unda cu tin participacion di e esunnan cu tin un permiso di taxi, pero e pregunta ta keda dicon e mandatario kier haci algo full contra di algo cu ta den ley. Di e manera aki no ta e manera di goberna y tampoco no ta bay haya personanan cu kier sinta na mesa unda cu ta e mandatario so kier bisa kico e kier pa wordo haci unda cu kier haci su ley na e manera cu e ta pensa y ningun hende no por bisa nada y ta impone riba tur e taxistanan, esaki no por segun Linda Orman
E comision a haya tur informacion y awor a indica na e grupo cu e comision lo yama minister pa reunion den e comision na parlamento. E trato cu a ricibi di e comision di transporte publico ta e manera di trata hende y cu ta e trato cu ta di for di dia 1 a pidi minister Ursell Arends pa oido debi cu a pidi e mandatario diferente reunion pero nunca e no a traha y of duna oido na e taxistanan y esey ta di lamenta.
