Oficina Central di Estadistica y e team di Censo ta cla pa start Censo 23

Despues di varios luna di preparacion Oficina Central di Estadistica (Centraal Bureau voor de Statistiek – CBS) y e team di Censo ta cla pa start Censo 23. Durante e periodo  di 2 di september pa 20 di october Censo lo pasa na tur cas na Corsou pa haci conteo di habitante y viviendanan riba e isla. Durante di e periodo aki e encuestadonan lo ta activo henter dia pa asina conta tur hende.

Encuestadonan.

Durante e periodo di Censo23 e encuestadonan (+/-750) lo pasa cas pa cas, den e barionan di Corsou pa encuesta personanan den cada cas di famia. Tur encuestado cu presenta na cas di un persona, tin un ‘hesje’ (chaleko) blou cu logo di Censo 23 bisti. Cada encuestado mester identifica su mes cu un ‘badge’ cu su potret y nomber. E badge tin firma di e director riba dje. Tambe tin un QR code riba e badge, cu por scan si kier verifica cu e encuestado ta un encuestado oficial di CBS. Por yama tambe na number di telefon 839-2300 of 520-2227 pa verifica esaki. E ultimo aki ta number di Whatsapp tambe.

Formularionan di pregunta

E biaha aki e encuestadonan ta yena e formulario di Censo 23 den forma digital. E lista di pregunta ta den 4 idioma (papiamento, Spaño, Ingles y Hulandes). Ta uza e idioma cu e personanan di e cas ta prefera. E preguntanan tocante entre otro demografia tur persona den cas ta contesta, y un persona den e famia ta contesta e otro preguntanan.

Facilita e proceso

E encuesta lo dura mas o menos 45 minuut. Esaki ta depende con grandi e cas di famia ta. Naturalmente ta bon pa tur hende den cas duna nan aporte completo. Loke por facilita e proceso, ta si tur hende tin algun informacion na man pa asina por contesta e preguntanan mas lihe. Riba website di Senso23 tin un checklist cu por uza. Esaki ta e link https://senso.cbs.cw/cheklist-pa-senso-2023.

Anónimo

Censo ta completamente anonimo. Lei di Estadistica ta indica cu tur informacion individual colecta den Censo mester ta secreto. Ley di Statistik ta accesibel riba e website di CBS, www.cbs.cw.

Alternativa

Si e encuestado di Censo 23 pasa na un cas caminda niun habitante ta presente, e encuestado lo uza e alternativa di laga un carta pa e habitante pa e por pasa atrobe. E habitante por yama pa traha un cita na un momento cu sigur e lo ta presente. Di e otro banda, si acaso un hende ripara cu encuestadonan di Censo 23 no a pasa su cas ainda, e por tuma contacto cu CBS dor di e-mail senso@cbs.cw òf yama 839-2300/520-2227 òf manda mensahe via di Whatsapp pa e último aki.

CBS ta conta cu cada miembro di comunidad lo coopera pa haci Censo 23 tambe uno exitoso. Pa e motibo aki CBS ta yama un y tur pa duna aporte completo, ya asina nos sa con nos ta.