Diasabra anochi e cayanan di Rancho y bisindario a yena cu alegria y speransa. Bisiñanan a subi caya y bay na sede di Stephany pa asina presencia y apoy’e na momento di e lansamento oficial como candidato di AVP.
E anochi a cuminsa cu oracion di varios pastoor, sigui pa palabra di su orguyoso casa, pero tambe di su tata Benny Sevinger, den compania di su casa y mama di Stephany, Claudia. E publico tabata hopi entusiasma caba ora cu Daniel Susebeek a bin dilanti pa hiba palabra.
El a comparti su preocupacion, no solamente a costo halto di haci negoshi, pero tambe e situacion precario di e comunidad. Esey ta e motibonan pakico e ta comparti e vision nobo di maneho di AVP y ta apoya e candidatura di Stephany Sevinger, como ehempel di e vision nobo; un hoben profesional cu ta dispuesto pa traha duro pa su isla.
Naturalmente, lider di AVP, Mike Eman tambe a dirigi su mes na e publico grandi den Weststraat y a brinda un discurso cu a sa di trata e diferente puntonan cu ta mas ta importante e ciudadano awendia. Pa Eman, e candidatura di Stephany tin un balor special como un mucha cu el a mira nace, crece adoptando e amor pa servicio na prohimo.
Ora cu a toca turno pa Stephany mes bin riba scenario, el a haci esaki cu gran energia, sigurando cu e trabou a cuminsa pa bay di bario pa bario y laga cada un bira un luga digno pa biba y su cu su habitantenan tin e prosperidad pa hiba un biba un bida husto.
E ta yama un y tur bon bini pa yega mainta na su sede pa asina e por tende e preocupacion, e duda, hiba dialogo y traha hunto riba loke mas Aruba tin mester. Atardinan e mes lo sali pa bishita cas y mantene e tradicion di AVP di ta cerca di e pueblo. Di mesun forma e generacionnan di mas hoben ta encurasha pa laga un mensahe na cualkier di e plataformanan social pa asina duna tur opinion su debido atencion.
“Mi ta sumamente honra cu, no solamente mi por representa e generacion nobo, pero tambe mi tin un sosten masha grandi di nos generacion mas mayor, mas grandi y esaki ta un combinacion grandi y perfecto pasobra mi ta sinti cu nos ta hunto, uni, completo. E ta oportunidad y prosperidad pa un y tur,” asina Stephanie a bisa den su discurso diasabra anochi.
Momentonan despues Stephany a sinta hunto cu Mike Eman pa firma su declaracion di consentimento pa candidatura, oficialisando asina cu e ta forma parti di e lista victorioso berde pa eleccion venidero y cu lo keda presenta diabierna awo 18 di october.
