Nos comunidad cresiendo, esey ta berdad, casi tur caminda tur cos ta birando di mas
Nos hendenan trahando cu tur sinceridad, cu otronan sin trabao cu of sin salario lepiando na cas
Ta ser bisa, cu falta di trahador den sector hotelero, cu arubianonan ta floho
Ta ser bisa, cu ta pa via di tur e cosnan moderno, ta purba domina otro na nan antoho
Hende ta wordo reemplaza cu programanan riba computer cu sa pega y faya mahos
Hende ta wordo poni un banda pa mas auto , brommer, bicicleta, autoped, scooter of otro cos
Ta ser bisa, cu tin arubianonan sobrecualifica cu no kier traha den fin di siman of te laat
Ta ser bisa, cu ta custumber awor cada ves WEB , ELMAR of INTERNET keda plat
Nos infrastructura no por sigui carga e peso grandi cu ta birando di mas
Pero, hopi ta ni worry mes, basta tur cos ta bon den nan bario, den nan caya y den nan cas
Como e Poeta cu amor y pasion, cu ta move den pueblo, scucha y sinti cu pueblo tur dia
Nos tin cu bisa, cu no ta tur caminda tin e balans den trankilidad, paz y alegria
Famianan cu kier bai nan Misa y celebra bida hunto den fin di siman? Un bon decision !
Famianan manera antes, cu ta yuda otro y duna otro un man? Un bendicion !
Pa complace e turista, ta purba di drecha tur lugar mahos y problematico cu ta na bista
Nos di Dadelstraat , ainda no por hanja un of mas verkeersplateau , nos no ta riba e lista
Pasobra cu tin un famia Eman ta biba den Dadelstraat un tiki mas pariba, hopi ta bisa
Ach, nos a cana aki aya, colecta firma, yama na telefon y yena tur sorto di formulario
Kere cu no tin mas odio of venganza pa motibo politico pa cu tal y tal nomber den nos bario
Ach, mil biaha nan a laga e nomber di e otro caya keda “Rondweg”, mas felis. Un sonrisa !
Nos no kier keha ni punta dede riba ningun hende den nan departamento of den nan funcion
Nan no por yuda, of no ta capacita ,of no ta den nan man pa tuma ningun decision
Nos a varia voto pa diferente color pa duna tur un chens, pero no ta interesa mas awor
Lady Ruth ta prefera di sigui inspira su poemanan di nostalgia, di positivismo, alegria y amor
Y sigui kere cu den cada famia tin un bon obrero, un arubiano fuerte balente, un bon trahador
Cu ta traha pa biba y no biba pa traha mata biechie y despues nan ta kitabo, mandabo cas
Pa cualkier motibo fofo ,un trampa, pa envidia, of pa un malcomprondemento humano
Kere cu nan mes ta sin pica, lubida cu tin un Dios riba tur cabes , nan consenshi ta remordia?
Nos mundo ta bunita ketobay, pero tur cos ta draai rond di mas material, placa, sex y mas poder
Tin cu kier tur cos cu nan mira otro tin, tin biaha sin traha p’e nan ta kere cu nan bida no tin fin
Pabien na e obereronan den tur ramo, na e obreronan cu tin ainda nan bon trabao
Na esnan cu ta para pa nan derechonan y no na “amen” di nan hefenan tin biaha abusador
Na esnan cu ta serio, cu respet, duna bon servicio, sin wordo abusa di nan tempo di mas
Boso bida ta balioso, boso tempo ta precioso, traha, biba, sosega, duna Dios danki y come bon
E dolor di curason di otronan ta yega shelo un dia y Dios lo manda su debido bendicion
Stima boso famia, aleha fei tentacion, cuida boso salud, stima boso isla y yuda cuide’le bon
E servicio hotelero tin cu bay mas poco poco, sin ansha lembe core” pura pura” pa complace
Si nan no ta contento, nan keda leu di akibanda, yama bon bini na esnan cu ta bin cu si ta stim’e, cu kier conos’e su cultura den su tradishonnan crioyo, norma- y balornan den fe y cu amor.
Ruthy”Lady Ruth” Vrieswijk-Bergen.( Un poema prosa cu criticanan constructivo )
