Obra SPIRITO un obra di teatro “de novela”

SPIRITO ta e siguiente obra di teatro di Cas di Cultura den colaboracion cu Faritah Luidens (tambe conoci como Tica Basha Abou y di e obra humoristico Amiganan pa Semper). SPIRITO lo wordo dirigi pa di e gran directora di teatro, opera y film Europeo, sra. Hilda Hellwig. Sra. Hellwig tin mas cu 80 obra na su nomber.

Den zomere’la haci un gran audicion na Shanhai, China, pa cuale’la wordo invita pa traha un obra di Ibsen cu top actornan Chines. Sra. Hellwig a namora di Aruba algun aña atras y ta biba aki part-time pa “de-stress” ora su bida druk di trabou y viaje den ta bira di mas.

Nos ta honra pa por conta cu su genio inigualabel na Aruba y e mes ta encanta pa por traha cu Aruba su profesionalnan di teatro den nos lenga materno Papiamento. Como cu teatro ta un manera importante cu ta stimula expresion, inspira creacion y un manera impactante pa trece topiconan actual riba e mesa di dialogo, e fondonan cultural UNOCA, Fonds Podium kunstenen Prins Bernhard Cultuur fond Caribisch Gebied a mira e importancia pa apoya un obra pa adulto bek riba escenario di Cas di Cultura.

SPIRITO ta toca e tema di relacionnan familiar usando drama, humor, picardia, intriga y tencion (edad 16+). Famia Alving, un famia cu “moda”,ta bezig ta deal cu un pasado cu ainda ta sigui nan den presente. Tur e personahenan tin nan propio muchila di problema, reto y secreto y riba un dia tur cos ta wordo revela. E storia, originalmente di Henrik Ibsen, e tata di teatro moderno, ta specialmente scohi pa Aruba door di directora sra.Hellwig, cu a mira e contexto di Aruba y e temanan social cu ta reina. Sra. Hellwig a situa e storia den añanan 1980, e dianan di gloria di e novelanan di Venezuela y Latino America.

Asina,manera un novela, cu hopi suspenso e storia ta wordo treci. Sra. Hellwig ta un pionero di teatro “avantgarde”, p’esey por spera un manera unico di conta e storia aki. Tambe lo tin un décor espectacular, special traha pa esaki.

Actuacion ta den man di Faritah Luidens, Ferdinand Franca, Jhon Freddy Montoya, Tuesday Irwin, Dimanche-Jolie y Carlos Croes. Traduccion tabata na encargo di Papiamentista sra. Ramon Todd Dandare. Produccion ta den man di Cas di Cultura y Faritah Luidens. Direccion y adaptacion bou liderazgo di director di teatro sra. Hilda Hellwig. Dianan 19 y 20 di October tin funcion pa scolnan secundario y avansa pa klasnan cu alumno di edad di 16 bay ariba. Scolnan por yama pa informa. Pa mas informacion tocante carchi, acudi na Facebook page di Cas di Cultura of yama 582-1010. Dianan 20 y 21 di October pa 7.30pm na Cas di Cultura.