ORANJESTAD,Aruba
Representante di Obispado aki na Aruba Andres Makowiek a manda un carta pa directiva di SMOA den cual ta pidi nan retiro di inmediato.
Ta parce, segun e carta aki, for di 22 di mei ultimo caba a haci un apelacion na e directiva di SMOA, cu ta maneha Colegio Arubano a pidi e directiva pa no nombra nan mes bek of no prolonga nan termino, mirando cu esaki a pasa caba.
A resulta cu e directiva aparentemente a bay tras di lomba di Obispado y a haya aprobacion di e comision di mayornan di studiantenan di Colegio pa duna nan apoyo pa nombra R. Croes como Presidente di e directiva di SMOA.
Den e carta ta menciona cu e comision di mayornan OCCA no tabata na altura di e carta di 22 di mei, y a firma dia 27 di mei pa sostene nombramento di Robert Croes como presidente di SMOA.
Ta apela na directiva pa retira inmediatamente pa por nombra un directiva nobo pa bini cu un maneho administrativo renoba cu vision pedagogico pa trece trankilidad bek na e scol. Y sigura di e forma aki un bon forma di cooperacion y mehoracion di ambiente entre docentenan di e scol y directiva.
Den e mesun carta Obispado ta bisa cu nan y OCCA ta e uniconan, segun statuto pa nombra e miembronan. Ta pidi tambe pa para e proceso di reclutamento di rector te ora cu e directiva nobo sinta.
