Djadumingu 20 di desèmber 2020, alrededor di 22.35’or Sentral di Polis a risibi notifikashon
di un kaso di bringamentu ku a tuma lugá na un kas na Noord Zapateer.
E unidat polisial ku a yega na e sitio a komprondé ku eks partner di un dama a yega na kas
di e dama, kibra porta di kas, drenta paden. E hòmber sospechoso aki a kibra glas di outo di
partner di e dama i a maltraté.
Na e sitio polis a detené e hòmber sospechoso A.E.T. nasé na Kòrsou di 30 aña di edat, pa
maltrato i destrukshon.
A presentá e sospechoso dilanti un fiskal ouksiliar ku a ordená su enkarselamentu
pendiente di mas investigashon.
Detenshon relashoná ku atrako.
Kontinuando ku investigashon relashoná ku un kaso di atrako ku a tuma lugá 28 di
novèmber último na Cabo Verdeweg, polis a hasi dos detenshon.
Djaluna 21 di desèmber 2020, den oranan di mainta Tim di Atrako konhuntamente ku Tim
di Aresto a bai na un kas na Kaya Kalsit i a detené e hòmber sospechoso J.U.G. nasé na
Kòrsou di 32 aña di edat.
Seguidamente a bai na un kas na Cado Verdeweg i a detené otro hòmber sospechoso J.A.J.
nasé na Kòrsou di di 35 aña di edat. Durante investigashon na ámbos kas polis a haña i
konfiská artikulonan ku ta di importansia pe investigashon.
A presentá ámbos sospechoso dilanti un fiskal ouksiliar ku a ordená nan enkarselamentu
pendiente di mas investigashon.
Polis ta lokalisá venezolano ku a hui fo’i barak
Un unidat atento di U.S.T. (Unit Speciale Taken) ku tabata kore djadumingu 20 di desèmber
2020 alrededor di 11.12’or den Kura Piedra, a tuma nota di un di e hòmbernan venezolano
ku resientemente a hui for di barak na S.D.K.K., sintá den un outo.
E unidat mesora a bai tras di e vehíkulo aki i a duna e shofùr òrdu pa para. E shofùr a ninga
di sigui òrdu di polis i a hisa velosidat.
Polis a kuminsá ku un persekushon tras di e outo aki i den Kaminda Opal, e unidat a logra
para e vehíkulo.
A detené e hòmber venezolano aki i a entreg’é na e personal di Imigrashon.
Djadumingu 20 di desèmber alrededor di 10.31’or, Sentral di Polis a risibí informashon ku
un dama ku tabata den un grupo di algun persona mas riba quad, lo a aksidentá den mondi
den área di Koral Tabak.
Mesora a dirigí un unidat na e sitio, huntu ku ambulans i brantwer.
Debí ku no por a lokalisá e víktima na promé instante, a pidi tambe presensia di helikòpter
di Wardakosta, pa a yuda den e búskeda.
Na momentu ku a topa ku e dama ku a aksidentá, a transport’é pa e pista na Koral Tabak, di
unda el a wòrdu hibá ku ambulans pa C.M.C.
E tabata keha di dolónan interno i tabatin raspu na diferente parti di su kurpa.