Detenshon pa no duna oido na òrdu di polis
Riba djabièrnè 29 di desèmber, alrededor di 2.30 or di mardugá a detené un hòmber di inisial J.J.D. di 34 aña di edat pa no duna oido na òrdu di polis. E sospechoso tabata kousa molèster na un kasino situá na Bulevar J.A. Abraham. Trahadónan di seguridat a trata na intermediá pero sin resultado. Na yegada di polis, e sospechoso tabata mustra komportashon agresivo. A dun’e òrdu na diferente okashon pa bandoná e sitio di kua e no a duna oido. Pa e motibu aki a detené e sospechoso.
Aksidente
Alrededor di 4 or di atardi riba djaweps 28 di desèmber, ‘meldkamer’ sentral a risibí notifikashon tokante un aksidente riba tereno di un akomodashon turístiko na Bulevar E.E.G. Un vehíkulo a alkansá un hòmber. Despues di un investigashon kòrtiku a resultá ku e víktima a baha for di e vehíkulo i no a hinka esaki den ‘parking’ ku konsekuensia ku e vehíkulo a bai dilanti. E víktima a purba wanta e vehíkulo sin e resultado deseá. A konsekuensia di esaki el a resultá entre e vehíkulo i un muraya. Ambulans a transportá e víktima pa hòspital pa tratamentu médiko.
Hopi molèster di vürwèrk dor di muchanan sin supervishon
Durante e último dianan, ‘meldkamer’ sentral a risibí diferente notifikashon tokante molèster di muchanan ku ta tira vürwèrk den bario. Molèster komo ku nan ta tira vürwèrk riba outonan, kasnan i posiblemente bestia. Riba djárason 27 di desèmber, alrededor di 7.40 or di anochi a drenta notifikashon tokante un grupo di mucha ku tabata tira vürwèrk riba vehíkulonan pasando riba Kaya Macario (Cai) Sint Jago na altura di Parke Lanlan Clarinda. Na yegada di e patruya a topa ku e grupo di mucha i a kita e vürwèrknan for di nan. Un dia anterior tambe a drenta notifikashon tokante e mesun grupo di mucha ku tabata kousa molèster ku vürwèrk i a atendé ku nan serio riba nan komportashon.
KPCN kier enfatisá ku lo atendé di manera estrikto ku e komportashon aki i ku si ta nesesario, lo tuma medidanan ku ta kuadra. Komo ku mayoria biaha ta trata di muchanan menor di edat, KPCN ke hasi un apelashon na mayor(nan) tambe pa papia ku e yu tokante su komportashon i e konsekuensianan ku esaki por trese kuné. Por ehèmpel ku daño na terseronan (material òf persona) ta kastigabel i por tin konsekuensianan finansiero. Pero tambe hasiendo esaki, ta pone otronan i e mucha mes pero be na peliger. P’esei ta konsehá estriktamente pa muchanan menor di edat sende vürwèrk bou di supervishon di un mayor di edat. Bo ta kousa molèster ku vürwèrk? E ora ei polis por kita esaki.
Shofùr di skuter ta neglishá òrdu di polis
Riba djasabra 23 di desèmber, alrededor di 8 or di anochi un patruya un spòt shofùr di un skuter sin hèlm bistí riba karetera públiko den Amboina. Ademas e shofùr tabata hòp e skuter. Pa e motibu aki, e patruya a duna e shofùr òrdu pa para na kua e no a duna oido i a sigui kore. Riba esaki e patruya a sigui su tras i diferente bes a duna e shofùr òrdu pa para. Finalmente el a para den kurá di un kas na Amboina. Despues di un kòntròl mas aleu e shofùr no por a mustra un reibeweis bálido i tampoko papelnan di seguro bálido. Pa esaki el a haña un but i a konfiská e skuter.