Entrada hudisial
Den oranan di mainta riba djaweps 24 di òktober, un entrada hudisial a tuma lugá den un kas situá
na Kaya Linda. Reshèrshi di KPCN i e Grupo di Tarea Spesial (Groep Bijzondere Opdrachten, GBO) a
kondusí e entrada hudisial. Durante e entrada hudisial a topa i konfiská supstansianan
probablemente narkótiko i a konfiská esakinan pa mas investigashon. Den oranan di atardi,
alrededor di 4.50 or, e sospechoso ku tabata buska, a mèldu su mes na warda di polis. A detené e
hòmber di inisial R.R.R.M. di 30 aña di edat pa menasa, maltrato ku un arma i destrukshon.
Investigashon den e kaso ta kontinuá.
Ladronisia di bateria
Djaweps 24 di òktober a drenta keho di ladronisia na Te Amo Beach situá na Kaya Internashonal.
Entre 2 or di atardi i 4.30 or di atardi riba e fecha menshoná, deskonosÍnan a bai ku un bateria di un
E-Bike ku tabata riba e sitio di stashoná. Ta investigando e kaso.
Detenshon pa manehá bou di influensia
Djaweps 24 di òktober, alrededor di 2.35 or di atardi, a detené un hòmber di inisial L.P.A. di 33 aña di
edat riba Kaya Promé pa manehá bou di influensia di alkohòl. E sospechoso a dal ku su vehíkulo den
un outo ku tabata pará kantu di kaya riba Kaminda Turístiko, i a sigui kore bai. Despues di
investigashon mas aleu, polis a enkontrá e vehíkulo den Rincon. Durante di e kombersashon ku e
shofùr tokante e aksidente ku el a okashoná despues di kua el a bandoná e sitio di e aksidente sin
para, por a konstatá ku e tabata mustra diferente karakterístika di un persona ku ta bou di influensia
di alkohòl. A hasi un tèst di supla for di kua a resultá ku el a konsumí mas alkohòl ku ta permití ora ta
manehá un vehíkulo. E sospechoso na e momentu ei no por a mustra un reibeweis i a haña un but. A
detené i hib’é warda di polis pa un análisis di rosea. A konsekuensia di e resultado di esaki, el a haña
un prohibishon pa manehá di 5 ora.
Ladronisia na bich
Djárason 23 di òktober a drenta keho di ladronisia na Playa Pal’i Mangel (Donkey’s Beach) situá na
E.E.G. Bulevar. Entre 11.30 or di mainta i 12.20 or di mèrdia, deskonosínan a bai ku un tas di bich, un
tas di lomba i un tas pa wanta kos friu, na momentu ku e doñonan a bai snòrkel. Ta trata di un tas di
bich koló blou, un tas di lomba koló bèrdè i un tas pa wanta kos friu koló blou skur. Den e tasnan
tabatin entre otro diferente brel, dos kamara di e marka Luminex, un telefòn iPhone 5 mini, yabinan
i un pòtmòni koló maron skur ku sèn kèsh. Ta investigando e kaso.
