Detenshon violashon Lei di Opio BES
Riba djaweps 21 di desèmber, alrededor di 1.45 or di mardugá, a detené un hòmber di inisial R.W.S. di 33 aña di edat na un kas riba Kaya Dr. Jose G. Hernandez pa violashon di Lei di Opio BES. Durante un patruya riba e kaya menshoná, e agentenan a spòt dos hòmber den kurá di e kas. Na momentu ku e hòmbernan a mira e patruya, un di nan a kuminsá komportá di forma sospechoso. El a hinka su man den su saku di karson i a tira algu afó. Pa e motibu aki e agentenan a tene un kòntròl na e sitio i a enkontrá un kantidat di paki ku probablemente supstansianan narkótiko. Pa e motibu aki a detené e sospechoso. A konfiská e pakinan ku probablemente supstansianan narkótiko. Investigashon den e kaso ta kontinuá.
Diferente but pa violashon den tráfiko
Entre djárason 20 di desèmber i djabièrnè 22 di desèmber a duna diferente but pa violashon den tráfiko durante kòntròlnan rutinario.
E butnan tabata pa lo siguiente:
5x pa stashoná robes;
1x pa manehá sin hèlm bistí;
2x pa manehá sin seguro bálido;
1x pa manehá sin reibeweis bálido.
KPCN ta hala atenshon di un i tur pa nan tin e dokumentunan nesesario, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla.
Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.
KPCN ta deseá komunidat kompleto felis dianan di fiesta!
Pasku ta den porta. Un periodo durante kua famia ta bini huntu i turistanan ta bishitá nos isla. Tur ku e intenshon pa pasa e dianan di fiesta akinan na un manera agradabel. A resultá ku e ora ei sa pèrdè e reglanan vigente i responsabilidat pa ku nos mes i nos próhimo for di bista. Pero esaki no ta nifiká ku e reglanan ta ménos vigente.
P’esei den e temporada benidero, KPCN lo intensivá e kòntròlnan di tráfiko na sitionan stratégiko i ku ta hopi bishitá. Den kaso ku no kumpli ku reglanan di tráfiko lo atendé ku e shofùr di forma estrikto.
Ta importante pa tur hende tene nan mes na e reglanan vigente di tráfiko pa asina alsa siguridat den tráfiko. Pasobra tráfiko sigur no ta solamente un asuntu di polis pero di shofùrnan di vehíkulonan motorisá tambe. Outomobilistanan i otronan mester ta konsiente ku: ta nan propio responsabilidat pa usa faha di seguridat, di e peliger di papia i manda mensahe na telefòn ora ta stür, di e peliger di uso di alkohòl ora ku ta stür i kon pa kore ku mucha den outo na un manera responsabel (por ehèmpel no sintá dilanti den outo, sino den un stul pa mucha patras den outo, etsetera).
Na kada kaso lo wak ta di ki tipo di violashon(nan) ta trata di dje i kua lo ta e mihó manera pa atendé ku esaki, hasiendo esaki ku rèspèt mutuo. Lo no tolerá violensia ferbal i/òf agresividat kontra nos trahadónan. Kolaborashon di un i tur durante di kòntròlnan i na momentu ku konstatá violashonnan ta kondusí na solushon pasífiko.
Kuerpo Polisial Hulanda Karibense ta deseá komunidat kompleto felis dianan di fiesta!