Aksidente entre outo i skuter
Djabièrnè 13 di sèptèmber, alrededor di 7.35 or di mainta, ‘meldkamer’ sentral a risibí notifikashon tokante un aksidente entre un outo i un skuter riba Kaya Grandi. E outo ku tabata bini for Kaya Endeavour, kier a subi Kaya Grandi pero no a duna preferensia na un skuter ku tabata kore den direkshon nort riba Kaya Grandi. Ambulans a transportá shofùr di e skuter pa hòspital pa tratamentu médiko.
Aksidente entre pikòp i crosser
Djaweps 12 di sèptèmber, alrededor di 6.10 or di atardi, un aksidente entre un pikòp i un ‘crosser’ a tuma lugá riba Kaya Korona na altura di Kaya Papa Cornes. Shofùr di e pikòp ku kier a lora na su man robes pa subi Kaya Papa Cornes, no a duna preferensia na e ‘crosser’ ku tabata aserká den direkshon kontrali. Shofùr di e ‘crosser’ a resultá heridá i ambulans a transport’é pa hòspital pa tratamentu médiko. Debí ku e no tabatin reibeweis ni tampoko seguro, a hiba e ‘crosser’ warda di polis.
Detenshon
Relashoná ku e investigashon i entradanan hudisial ku a tene djamars 10 di sèptèmber último den un kas na Amboina, Kaya Mazurka i Kaya Anna, na kua a konfiská un kantidat di supstansianan narkótiko, un arma di kandela i artíkulonan relevante pa e investigashon, a detené un sospechoso mas alrededor di 1 or di mèrdia riba djaweps 12 di sèptèmber. A detené e hòmber di inisial C.Q.P. di 23 aña di edat na warda di polis. Investigashon den e kaso ta kontinuá.
Ladronisia di baiskel
Djaweps 12 di sèptèmber a drenta keho di ladronisia di un baiskel koló pretu ku blanku di e marka Kross. A hòrta e baiskel, ku no tabata na lòk, den kurá di un kas na Kaya Mississippi entre 8 or di anochi riba djárason 11 di sèptèmber i 9 or di mainta riba djaweps 12 di sèptèmber. Ta investigando e kaso.
A enkontrá piskadónan perdí
Den oranan di mardugá di djaweps 12 di sèptèmber, ‘meldkamer’ sentral a risibí notifikashon ku tin un boto di piskadó pèrdí riba laman. Na bordo tabatin dos hòmber ku a sali pa bai piska for di djárason 11 di sèptèmber, alrededor di 7 or di mainta i no a regresá. Nan no tabata telefónikamente alkansabel tampoko. Otro piskadónan a mira e hòmbernan aki lastu biaha den nan boto na altura di Bachelor’s Beach. KPCN mesora a inisiá un búskeda. Alrededor di 4.30 or di mardugá, helikòpter di
Wardakosta a yega Boneiru i a kuminsá ku un búskeda na un altura abou riba laman te mas o ménos 6 or di mainta, pero sin e resultado deseá. Despues e avion ‘dash’ di Wardakosta tambe a bini Boneiru. Alrededor di 9 or di mainta a drenta notifikashon ku a enkontrá e piskadónan na Klein Bonaire. Un boto di STINAPA a bai mesora Klein Bonaire i a buska e dos piskadónan pa trese nan Boneiru. Nan tabata sano i salvo i a haña kos di kome i bebe serka turistanan riba Klein Bonaire. Nan a deklará ku pa un motibu òf otro nan boto a senk i koriente di laman a hibá nan Klein Bonaire.
