A haña skuter bèk despues di ladronsia
Den oranan di mardugá riba djabièrnè 13 di desèmber a drenta keho di ladronisia di un skuter koló pretu di e marka Kymco modèl Agility, ku plachi di number MF-9. Entre 1.15 or di mardugá i 2.45 or di mardugá riba e fecha menshoná, deskonosínan a bai ku e skuter. E skuter tabata stashoná na Kaya Bonaire. Den oranan di mainta, alrededor di 7 or riba e mesun fecha, ‘meldkamer’ sentral a risibí notifikashon ku a haña e skuter intakto bèk na Kaya Libertador Simon Bolivar. Polis a konfiská e skuter pa mas investigashon.
Detenshon pa manehá bou di influensia
Djaweps 12 di desèmber, alrededor di 7.55 or di anochi, ‘meldkamer’ sentral a risibí notifikashon tokante un aksidente na altura di un establesimentu di hóreka riba Kaya Andres A. Emerenciana. E persona ku a mèldu tabata sospechá ku un di e shofùrnan tabata bou di influensia di alkohòl. Na e sitio e agentenan a konstatá ku un pikòp, ku tabata bèk pa sali for di un sitio di stashoná, a dal den un outo ku tabata pasando. Konforme e maneho ‘botsen is blazen’, a hasi un tèst di supla ku ámbos shofùr enbolbí. A resultá ku e shofùr di e pikòp a konsumí mas alkohòl ku ta permití ora ta manehá un vehíkulo. A detené e hòmber di inisial J.L.d.l.C.G. di 51 aña di edat pa manehá bou di influensia di alkohòl i a hib’é warda di polis pa un análisis di rosea.A konsekuensia di e resultado di esaki a konfiská su reibeweis. Ademas e vehíkulo di e sospechoso no tabatin seguro i el a haña un but pa esaki. Esaki ta e di tres biaha ku ta detené e hòmber aki pa manehá bou di influensia di alkohòl i e di dos biaha ku ta konfiská su reibeweis.
Shofùr a bira malu mientras e tabata manehá
Djaweps 12 di desèmber, alrededor di 4.10 or di atardi, un aksidente a tuma lugá riba Kaminda tras di montaña. E persona ku a mèldu a duna di konosé ku e shofùr a bira malu i seguidamente a drenta mondi ku su vehíkulo. Na yegada e agentenan a topa ku personal di ambulans ku tabata atendé e shofùr. E tabata bei i no tabatin leshon visibel. Despues di chekeo médiko i un tèst di supla negativo, polis a disidí pa tene e reibeweis di e shofùr. Esaki debí na e echo ku resientemente e shofùr tabata enbolbí den diferente aksidente. Personal di ambulans a opta pa bai ku e víktima hòspital pa kòntròl médiko mas avansá.
Aksidente Hanchi Amboina
Djaweps 12 di desèmber, alrededor di 2.25 or di mardugá, ‘meldkamer’ sentral a risibí notifikashon tokante un situashon sospechoso na Hanchi Amboina. E persona ku a mèldu a mira un hòmber
drumi abou banda di un skuter kantu di kaminda. Na yegada di e patruya, e agentenan a topa ku un hòmber heridá ku tabata hole alkohòl. Despues di investigashon mas aleu e agentenan a mira ku parti dilanti di e skuter tabatin basta daño i ku esaki a bai dal den un palu di koriente. Ambulans a transportá e víktima pa hòspital pa tratamentu médiko i a hiba e skuter warda di polis.