Outo a bòltu
Djamars 3 di sèptèmber, alrededor di 10.55 or di anochi, ‘meldkamer’ sentral a risibí notifikashon tokante un aksidente riba Kaya Sabalo. Pa motibunan te ainda deskonosí, un outo a dal den kurá di un kas i despues bòltu. Na yegada di e patruya a topa ku e víktima ainda den e outo i e no tabata komuniká. E bentananan tabata será i e portanan tabata na lòk. Mirando e situashon i debí ku e shofùr tabata pegá den e outo, a pidi presensia di brantwer pa saka e víktima for di e outo. Despues ambulans a transportá e shofùr pa hòspital pa tratamentu médiko.
Detenshon pa manehá bou di influensia
Djaluna 2 di sèptèmber, alrededor di 8.15 or di anochi, a detené un dama di inisial I.B. di 38 aña di edat riba Kaminda Djabou pa manehá bou di influensia di alkohòl. E sospechoso tabata enbolbí den un aksidente riba e kaya menshoná. Konforme e maneho ‘botsen is blazen’, a hasi un tèst di supla kuné i a resultá ku el a konsumí mas alkohòl ku ta permití na momentu ku bo ta manehá un vehíkulo. A detené e dama i a hib’é warda di polis pa un análisis di rosea. A konsekuensia di e resultado di esaki a konfiská su reibeweis.
Alrededor di 11.10 or di anochi riba e mesun dia, mientras e agentenan tabata atendé ku un aksidente riba Kaminda Djabou, nan a keda aserká pa un persona ku tabata pidi yudansa pa un dama ku tabata pegá na un porta di kurá di heru na un kompleho di apartamentu riba Kaya Sirena. Na yegada di e agentenan na e sitio a resultá ku tabata trata di e mesun dama ku a detené mas trempan riba e dia pa manehá bou di influensia di alkohòl. E dama a purba di bula over di e kurá, na kua esaki a bora su pia robes, despues di kua el a keda pegá. Brantwer a presentá na e sitio pa liberá e viktimá, despues di kua ambulans a transport’é pa hòspital pa tratamentu médiko.
Detenshon pa ladronisia
Djaluna 2 di sèptèmber, alrededor di 6.45 or di atardi, a detené un hòmber di inisial A.A.H.v.R. di 41 aña di edat na Sabadeco Terrace pa ladronisia. E sospechoso a hòrta un kantidat konsiderabel di karni for di un kompania. Ta investigando e kaso.
Bo a mira algu sospechoso? Yama 911/112 òf e liña di tep anónimo 9310.
