Molèster di kachó
Riba djárason 13 di mart, alrededor di 7.05 or di mainta, ‘meldkamer’ sentral a risibí notifikashon tokante dos kachó ku a ataká un otro kachó (un chihuahua) na Kaya Buni. Na yegada di e patruya e persona ku a mèldu a deklará ku esaki no ta e promé biaha ku e kachónan di su bisiña ta ataká su kachonan i ku den pasado nan a morde i mata un kachó di dje. A konseh’é pa hiba su kacho un dòkter di bestia.
A papia ku e doño di e kachónan riba e situashon aki i a notifik’é ku si for di e investigashon result ku ta su kachónan a ataká e chihuahua, lo tuma medida.
KPCN ke hala atenshon di doñonan di kachó pa tene kachónan den kurá dor di sòru pa un kurá bon será for di kua e kachónan no por sali i/òf pa mara e kachó pa prevení tipo di situashonnan asin’aki. Abo komo doño ta responsabel pa e komportashoni treinen di bo kachó.
Tres detenshon pa maltrato i violensia públiko
Riba djamars 12 di mart, alrededor di 3 or di atardi, un hòmber a bini bali na warda di polis i a deklará ku un mucha hòmber a maltrat’é na un adrès den Antriol. E hòmber no tabata sa ken e mucha hòmber ta i no tabata sa e adrès tampoko. P’esei el a bai ku un patruya na e adrès pa un intervenshon entre e ku e mucha hòmber.
Riba Kaya Dradu el a para dilanti di un kas. Aki a surgi un diskushon entre e hòmber i algun persona ku tabata presente ku a terminá den un bringamentu. Pa e motibu aki, e persona ku a mèldu, a morde un agente ku a bai purba kita e partidonan for di otro na su man drechi. P’esei a detené pa maltrato di un agente. Ta trata di un hòmber di inisial A.M.D. di 33 aña di edat. Durante e bringamentu, e sospechoso a haña sla na su kabes pa kual motibu e tabata heridá na su kabes. Pa esaki a detené un mucha hòmber di inisial J.S. di 17 aña di edat i un hòmber di inisial A.C.W. di 26 aña di edat pa violensia públiko.
Personal di ambulans a hasi un chekeo médiko na warda di polis ku e sospechoso ku tabata heridá i e agente ku e sospechoso a morde, despues di kua a transportá e sospechoso pa hòspital pa tratamentu médiko. Ta investigando e kaso.
Detenshon pa menasa ku un arma
Riba djaluna 11 di mart, alrededor di 8.25 or di anochi, a detené un hòmber di inisial G.P.A.L. di 47 aña di edat na Kaya Simadan pa menasa ku un arma. E sospechoso a menasá ku un otro hòmber ku morto, ku un kuchú. Ta investigando e kaso.
Bo a mira algu sospechoso? Yama 717 8000 òf e liña di tep anónimo 9310.
