‘Hit & Run’
Alrededor di 9 or di anochi riba djabièrnè 7 di yüli, un ‘Hit & Run’ a tuma lugá riba Kaya Bonaire. Un outo koló pretu di e marka Audi a dal den un otro outo di hür ku tabata stashoná i despues a kore bai.
Aksidente Kaya Korona
Riba djabièrnè 7 di yüli, alrededor di 5.20 or di atardi, un aksidente entre dos vehíkulo a tuma lugá riba Kaya Korona. Durante un kòntròl a resultá ku un di e shofùrnan no por a mustra un reibeweis bálido ni dokumentonan di seguro. El a haña un prosèsferbal pa esaki.
Detenshon pa manehá bou di influensia
Riba djasabra 8 di yüli, alrededor di 9.40 or di anochi, un aksidente entre dos vehíkulo a tuma lugá riba Kaminda Onima. Durante un kòntròl ku un tèst di supla a resultá ku un di e shofùrnan tabata bou di influensia. A detené e hòmber di inisial L.N. di 44 aña di edat pa manehá bou di influensia di alkohòl.
Detenshon pa Lei di Arma BES
Alrededor di 4 or di atardi riba djasabra 8 di yüli, ‘meldkamer’ sentral a haña notifikashon di un hòmber ku tabata kana ku un arma blanku riba Kaya Industria. A detené e hòmber di inisial E.P.S.J. di 63 aña di edat pa violashon di Lei di Arma BES.
Detenshon pa maltrato ku arma
Riba djasabra 8 di yüli, alrededor di 11.15 or di mainta, ‘meldkamer’ sentral a haña notifikashon di un kaso di hinkamentu na Kaya C.D. Crestian di kual un hòmber a hinka un otro hòmber. Despues e víktima a drenta su outo i a kore bai un otro sitio i a yama ‘meldkamer’ sentral riba e liña di emergensia. Personal di ambulans a duna e víktima tratamentu médiko miéntras ku polis a tuma su deklarashon i keho. A detené e hòmber di inisial H.N.J. di 72 aña di edat pa maltrato ku un arma. Investigashon den e kaso ta andando.
Aksidente Kaya Korona
Alrededor di 8 or di mainta riba djasabra 8 di yüli, un aksidente entre un pikòp i un skuter a tuma lugá riba Kaya Korona. Shofùr di e skuter a resultá heridá i personal di ambulans a dun’é tratamentu médiko. Durante un kòntròl a resultá ku shofùr di e skuter no tabatin un reibeweis bálido ni tampoko dokumentonan di seguro. El a haña un prosèsferbal.
Diferente detenshon pa maltrato
Den oranan di mardugá riba djadumingu 9 di yüli, ‘meldkamer’ sentral a haña notifikashon di un kaso di maltrato na Hanchi Amboina. Despues di un aksidente, a surgi un bringamentu di kual tres hòmber a maltratá i atraká e víktima. Relashoná ku e kaso aki, polis a detené tres sospechoso. Ta trata aki di un hòmber di inisial S.I.R.B. di 24 aña di edat, un hòmber di inisial J.M.C. di 28 aña di edat i un homber di inisial R.P.M.F. di 38 aña di edat en konekshon ku maltrato i ladronisia.
Aksidente Kaminda La Union
Riba djadumingu 9 di yüli, alrededor di 9.20 or di anochi, un aksidente ku un outo a tuma lugá riba Kaminda La Union. E vehíkulo a bai resultá den mondi. Shofùr di e outo a resultá heridá i personal di ambulans a dun’é tratamentu médiko.
Outo a bòltu
Alrededor di 7.20 di mainta riba djaluna 10 di yüli, un aksidente a tuma lugá riba Kaminda Tra’i Montaña. Shofùr di un outo a bai purba pasa dos otro vehíkulo na momentu ku un di e vehíkulonan a wanta brek diripiente. E shofùr a purba desviá pero a pèrdè kòntròl i bòltu ku su vehíkulo den mondi kantu di kaminda. Ambulans a transportá e shofùr pa hòspital pa tratamentu médiko.
Detenshon pa maltrato
Riba djamars 11 di yüli, alrededor di 2.15 or di atardi, a surgi un bringamentu entre dos dama na un establesimentu situá na Kaya Soeur Bartola. Un unidat di polis ku tabata den e edifisio pa un otro asistensia, a para e bringamentu entre e dos damanan i a detené ámbos pa maltrato. Ta trata aki di un dama di inisial H.A.R.D. di 29 aña di edat i un dama di inisial K.D.V.T. di 22 aña di edat.
1 comment
[…] Source link […]