Notisia di polis di djabièrnè 30 di yüni te ku djaluna 03 di yüli 2023

Detenshon pa manehá bou di influensia

Alrededor di 3.10 or di atardi riba djadumingu 2 di yüli, un patruya di polis a spòt shofùr di un skuter den direkshon prohibí. Durante un kòntròl a resultá ku e shofùr tabata bou di influensia. A detené e hòmber di inisial F.J.M.P. di 36 aña di edat en konekshon ku maneha bou di influensia di alkohòl i a kita su reibeweis ku lo keda na disposishon di Ministerio Públiko.

Ladronisia di tapa di wil

Riba djasabra 1 di yüli a drenta keho di ladronisia di 4 tapa di wil. Alrededor di 11.30 or di anochi riba djabièrnè 30 di yüni, deskonosínan a bai ku e tapanan di wil di un Toyota Yaris ku na e momentu ei tabata stashoná na un establesimentu di horeka situá na Kaminda di Lac. Investigashon den e kaso ta andando.

Detenshon pa manehá bou di influensia

Alrededor di 1.20 or di mardugá riba djasabra 1 di yüli, ‘meldkamer’ sentral a risibí notifikashon di un aksidente ku a tuma lugá na Hanchi Amboina. Shofùr di un outo a kore dal den un palu di lus. Despues di un kòntròl a resultá ku e shofùr tabata bou di influensia di alkohòl. A detené e hòmber di inisial J.L.M. di 38 aña di edat. 

Detenshon pa matrato ku arma

Riba djasabra 1 di yüli alrededor di 6.30 or di atardi, ‘meldkamer’ sentral a risibí notifikashon di un un kaso di maltrato ku a tuma lugá riba Kaya Dr. Jose G. Hernandez. E sospechoso a maltratá e víktima ku un bòter i a bandoná e sitio. Personal di ambulans a duna e víktima tratamentu i despues a transport’é pa hòspital pa tratamentu médiko. Alrededor di 7.10 di anochi, un patruya di polis a topa ku e sospechoso i a detené e hòmber di inisial F.J.M.P. di 36 aña di edat en konekshon ku maltrato ku un arma. Ta investigando e kaso.

Aksidente

Riba djasabra 1 di yüli alrededor di 3.20 or di atardi un aksidente a tuma lugá riba Bulevar Miguel Pourier. Un outo ku tabata direkshon Rincon a dal den un buriku ku tabata krusa kaya. E buriku a bai resultá riba winshil di un otro outo ku tabata direkshon Playa. Shofùr di e di dos outo a spanta enorme i personal di ambulans a trat’é na e sitio pa despues transport’é pa hòspital pa kòntròl médiko.

Diferente prosèsferbal den wikènt pa violashon di Lei di Tráfiko

Wikènt último diferente patruya di polis a duna prosèsferbal pa violashon di Lei di Tráfiko. Den oranan di mainta riba djadumingu 2 di yüli a duna sinku shofùr un prosèsferbal: tres pa uzo di telefòn tras di stür, unu pa manehá sin un reibeweis bálido i sin dokumentonan di seguro i unu pa manehá sin un reibeweis bálido. Durante dia riba djasabra 1 di yüli, a duna dos shofùr un prosèsferbal pa uzo di telefòn tras di stür. Den oranan di anochi riba e mesun dia, un aksidente entre dos outo a tuma lugá riba Kaya Monseigneur Nieuwindt. Despues di un kòntròl a resultá ku un di e shofùrnan no tabatin un reibeweis bálido i tampoko dokumentonan di seguro. El a haña un prosèsferbal pa esaki. Riba djabièrnè 30 di yüni, un aksidente a tuma lugá riba Kaya Sabana. Shofùr di un outo a haña un prosèsferbal pa manehá sin un reibeweis bálido i sin dokumentonan di seguro. Den oranan di atardi riba e mesun djabièrnè a duna pasahero di un outo un prosèsferbal pa no tin su faha di seguridat bistí.