Kandela den kas
Riba djadumingu 21 di yanüari, alrededor di 8.30 or di anochi, ‘meldkamer’ sentral a risibí notifikashon tokante kandela den un kas den bario Kibrahacha. Na yegada di e patruya, a konstatá un kantidat di huma ku tabata sali for di e kas. E habitantenan tabata pafó di e kas i polis a evakuá e bisiñanan. Brantwer a bini na e sitio i a hasi nan trabou i a paga e kandela. A resultá ku e kandela a originá dor di un fèn (ventilator) den un di e kambernan. Personal di ambulans a hasi un chekeo médiko ku habitantenan di e kas na e sitio mes. No tabatin herido, pero si daño material na e kas. Kuerpo di bombero a buska un alohamentu temporal pa e habitantenan.
Aksidente entre outo i skuter
Riba djadumingu 21 di yanüari, alrededor di 7.20 or di anochi, ‘meldkamer’ sentral a risibí notifikashon tokante un aksidente riba Bulevar Gobernador N. Debrot. Na yegada di e patruya a resultá ku un skuter a dal den un outo. Shofùr di e outo a deklará ku e tabata bini for di Kaya Irene, pa subi Bulevar Gobernador N. Debrot direkshon Kaya Grandi ora ku el a mira un lus tabata bini leu ayá for di Kaya Grandi. Diripiente el a tende un zonido duru na e banda robes di su vehíkulo. Shofùr di e skuter pa e motibu aki a resultá heridá i ambulans a transport’é pa hòspital pa tratamentu médiko. Situashon di e víktima ta stábil. A hasi un tèst di supla ku e shofùr di e outo i e resultado di esaki tabata negativo. Polis a sera e kaya un ratu pa e servisionan konserní por a hasi nan trabou. Pa motibu ku tabatin zeta a basha riba kaminda a konsekuensia di e aksidente, a pone direktorado di R&O na altura pa akudí na e sitio pa basha santu riba dje. Departamentu di tráfiko ta kontinuá ku e investigashon.
Holó di gas den restourant
Riba djadumingu 21 di yanüari, alrededor di 5.15 or di atardi, ‘meldkamer’ sentral a risibí notifikashon tokante un holó fuerte di gas den un restourant na Kaya Sonmontuno. Na yegada di e patruya a saka tur hende pafó. Personal di brantwer a bini na e sitio i a hasi nan trabou. Despues di un investigashon a resultá ku tabatin un lekkage den e pipa prinsipal. A sera e pipa i a bisa e doño klaramente ku e no por usa e kushina mas. Despues ku drecha e pipa, brantwer mester kontrolá esaki promé ku usa e kushina atrobe. Mas aleu e restaurant por a sigui bende bebida.
Shofùr di crosser no a duna oido na òrdu di polis
Riba djaweps 18 di yanüari, alrededor di 6.10 or di atardi, a spòt shofùr di un crosser sin hèlm bistí riba Kaya Kamari pa kual motibu e patruya a bai su tras. Pa e motibu aki a duna e shofùr òrdu pa para pa medio di lusnan óptiko i señal di zonido. E no a duna oido na esaki i a hisa su velosidat. E shofùr na e momentu ei a pasa dos vehíkulo na mes momentu na banda robes di kaminda, miéntras e tráfiko kontrario tabata aserkando. E shofùrnan aki mester a wanta brek na e momentu ei pa evitá un aksidente. Dor di e komportashon di manehá di e shofùr di e crosser na e momentu ei, el a okashoná peliger pa su mes i otro usarionan di tráfiko. Seguidamente el a stòp riba Kaya Monseigneur Nieuwindt. Despues di un kòntròl, e shofùr no por a mustra un reibeweis bálido ni un seguro bálido. Pa e motibu aki e shofùr a haña un but i a konfiská e crosser i a hib’é warda di polis.
Diferente but pa violashon den tráfiko
Entre djaluna 15 di yanüari i djaluna 22 di di yanüari a duna diferente but pa violashon den tráfiko durante kòntròlnan rutinario.
E butnan tabata pa lo siguiente:
3x pa manehá sin reibeweis bálido;
4x pa manehá sin hèlm bistí;
4x pa tene telefòn den man miéntras ta manehá;
2x pa kore den direkshon prohibí;
1x pa kore ku lus di dilanti i patras dañá;
2x pa manehá sin seguro bálido;
5x pa manehá sin faha di seguridat bistí.
KPCN ta hala atenshon di un i tur pa nan tin e dokumentunan nesesario, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla.
Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225