Gezaghèber di Entidat Públiko Boneiru ta anunsiá ku pa motibu di e situashon di COVID-19 tin
kambio den e aktividatnan ku ta permití den periodo di 17 di desèmber 2021 te ku 12 di yanüari
2022. Gezaghèber ta enfatisá ku na e momentu akí no por premirá kon e situashon di COVID-19 lo ta
den luna di desèmber di e aña akí i den luna di yanüari 2022. Esaki ta nifiká ku mester tene kuenta ku e
reglanan relashoná ku COVID-19 ku na e momentu ei ta na vigor. Esaki por nifiká ku bo a haña un
pèrmit ku bo no por usa pa motibu di e situashon di COVID-19 ku por surgi na e momentu ei.
Tur petishon pa pèrmit i notifikashon den kuadro di Ordenansa General di Polis (Algemene Politie
Keur – APK) i pèrmit pa bende kuminda i kos di bebe (buffetvergunning) pa aktividat den periodo di
17 di desèmber 2021 te ku 12 di yanüari 2022 mester ta entregá digitalmente pa mas tardá 17 di
novèmber 2021 via e wèpsait https://bonairegov.com/ondernemers/vergunningen. Si no ta posibel pa
entregá e petishon digitalmente, por tuma kontakto ku departamento di Asuntunan Hurídiko i General
(JAZ) na Bulevar J.A. Abraham 27. Ta trata akí di entre otro pèrmit pa organisá un dibertishon
públiko, aktividat aksesibel pa públiko i/òf tokamentu di músika, por ehèmpel den kaso di
presentashon di grupo di gaita, aguinaldo i bari i tambú. Esaki ta enserá tambe petishon pa pèrmit pa
bende kuminda i kos di bebe (buffetvergunning).
No ta duna pèrmit pa presentashon di grupo musikal na e siguiente sitionan: henter Kaya Korona, Ons
Hoekje na Kaya Avelino J. (Abechi) Cecilia, skina di Kaya L.D. Gerharts i Kaya Lib. Simon Bolivar
(ántes Swiss Chalet i Super Comer), skina di Kaya Grandi i Kaya L. D. Gerharts (Centro), Kaya
Nikiboko Nort i Kaya Nikiboko Sùit i Kas di Hadrei (Cosy Corner) na Kaya Minguel Pourier. Ta
pèrmití presentashon na kiosko na Plaza Fraternan di Tilburg solamente riba djadumingu, pero no
durante oranan ku tin sakrifisio di misa den Misa San Bernardo.
Minimalmente dos dia promé ku un presentashon mester anunsiá e presentashon akí na departamento
di tráfiko di Kuerpo Polisial Hulanda Karibense (KPCN). Den kaso di un presentashon na kiosko na
Plaza Fraternan di Tilburg mester anunsiá esaki por lo ménos un siman adelantá na departamento di
tráfiko di Kuerpo Polisial Hulanda Karibense (KPCN).
Gezaghèber ta partisipá alabes ku empresanan i otronan ku ke bende i tira vürwèrk riba òf kantu di
kaminda públiko mester tin un pèrmit (di benta) pa hasi esaki. Pa esaki interesadonan mester entregá
un petishon pa mas tardá 19 di novèmber 2021 na departamento di Asuntunan Hurídiko i General
(JAZ) na Bulevar J.A. Abraham 27. Banda di e petishon pa e pèrmit (di benta) akí konforme artíkulo 3
di e ‘Vuurwerkbesluit Bonaire’ mester notifiká Kolegio Ehekutivo di aktividatnan relashoná ku
bendementu, almasenamentu i transporte di vürwèrk.
Relashoná ku gastunan di limpiesa esun ku ta hasi e petishon mester tuma kontakto adelantá ku Selibon
NV (717-8159). Huntu ku e petishon mester entregá e prueba ku a paga e gastunan di limpiesa òf un
suma di bòrg.
Intenshon di e areglo akí ta pa adelantá haña un bista di e kantidat di aktividat ku ta bai organisá
durante e periodo di 17 di desèmber 2021 te ku 12 di yanüari 2022 relashoná ku mantenshon di
òrden públiko, trankilidat i siguridat.
Pa hasi petishon pa pèrmit mester hasi uso di un formulario ku por haña riba e wèpsait
https://bonairegov.com/ondernemers/vergunningen. Personanan ku a entregá un petishon promé ku 19
di novèmber 2021 pa un pèrmit di APK i/òf un pèrmit pa bende kos di kome i kos di bebe
(buffetvergunning) mester buska e pèrmit aki pa mas tardá dia 22 di desèmber 2021 na Departamento
di Asuntunan Hurídiko i General (JAZ) na Bulevar J.A. Abraham 27. Si bo no ta den poseshon di un
pèrmit rekerí, bo ta kometé violashon di lei. Den kaso di violashon di lei ta tuma medida atministrativo
òf penal kontra e persona ku a violá lei.
Despues di 19 di novèmber 2021 no ta tuma ningun petishon pa pèrmit òf notifikashon pa aktividat den
periodo di 17 di desèmber 2021 te ku 2 di yanüari 2022 den tratamentu. Gezaghèber ta pidi tur hende
pa tene kuenta ku e término menshoná akí riba i pa tuma esaki na konsiderashon. Por haña mas
informashon na Departamento di Asuntunan Hurídiko i General (JAZ), number di telefòn 717 5330,
ekstenshon 2130 òf ekstenshon 2271.
