Nos tin ku empoderá nos hendenan lokal pa yena posishonnan klave

E miembro di Konseho Insular pa partido M21 Daisy Coffie ta trese dilante ku el a tuma nota di algun desaroyo kaminda nos propio hendenan kada biaha ta bini ménos na remarke pa posishonnan klave den nos komunidat. Daisy Coffie: ‘Nos no tin nada kontra ku na momentu ku ta buska hende pa sierto posishonnan, ku ta yena esakinan ku hende di eksterior pa motibu ku nan supuestamente ta mihó kualifiká. Pero mester por, ku huntu ku e personanan aki, den forma di ‘counterpart’ pues, ta pone hende lokal (hende di den region ku tin mas afinidat ku nos isla, nos kultura, nos idioma, nos hendenan) pa nan por desaroyá i prepará nan mes pa tuma e funshon over na momentu ku un oportunidat presentá.’

Mas aleu Daisy Coffie ta argumentá: ‘Si nos hendenan no ta kualifiká, nos mester ta dispuesto pa invertí den nan di tal manera ku debidamente nan por alkansá e kualifikashon deseá. Nos a komprondé ku por ehèmpel tabatin 4 vakatura na SGB: Finansa, Rekurso Humano, ICT i presidente di Kolegio di Direktiva, kaminda a yena dos kaba ku hulandes oropeo. Nos ta kere ku pa e dos posishonnan ku ainda mester yena, ta na su lugá pa konsiderá pone hende lokal i si no tin ningun hende lokal ku ta sufisientemente prepará pa e posishonnan akí, buska i prepará un hende lokal pa na su debido tempu e por tuma over.’  

Analisando e situashon aktual, sra. Coffie ta mustra riba e siguiente puntonan di importansia ku mester tene kuenta kuné pa nombra hende lokal:

1. Ekspertisio so no ta yabi pa un karera eksitoso. Konosementu di nos idioma, nos kultura, nos isla i nos hendenan ta mes òf mas importante ku solamente ekspertisio.
2. E persona hulandes oropeo ku bini Boneiru pa traha ta tuma, si e disidí di hasi esaki, kasi 3 aña pa integrá i aklimatisá na nos kultura i sistema.
3. Benefisionan pa nombra nos mes hendenan den posishonnan klave ta entre otro: komunikashon den nos mes idioma, kontinuidat, konosementu ta keda Bonaire, ta spar riba kosto di mudansa, un lokal por kuminsá traha mesora i tin un bon konekshon kaba ku e komunidat, nos kultura i nos idioma.
4. Alabes e aserkamentu di nos habitantenan ku ta papia solamente papiamentu i spañó ta bai mas fásil. Pa loke ta trata SGB (i otro skolnan): ya kaba nos alumnonan tin ku enfrentá muchu hopi barera, sigur e barera di idioma. No tin ningun sentido pa lanta mas barera pa nan. 

Finalmente Daisy Coffie ta konkluí: ‘Mester bini ku maneho aktivo pa pone nos mes hendenan den posishonnan klave di nos komunidat. Nos ta di opinion ku SGB por duna un ehèmpel di esaki na e momentunan akí: si tin solisitutnan lokal pa e funshonnan ku ainda ta habrí, ta na su lugá pa hasi un esfuerso, tumando tur e puntonan menshoná na kuenta, pa yena e posishonnan akí ku hende lokal.’