Nòchi Willem, konsehero di Union Sindikal Boneriano, USIBO ta splica cu esaki ta un kampaña agresivo ku UNKOBON den koperashon ku DE GOEDE ZAAK na Ulanda ta hibando pa pone e preshon nesesario riba gabinete Rutte IV pa awor si stipulá un minimo sosial pa Boneiru, Saba i Statia. Banda di e kampaña aki miembronan di Eerste Kamer tambe a pone preshon, eksigiendo minimo sosial awor.
Den Tweede Kamer tambe diferente partido no ta komprondé pakiko no por stipulá e minimo sosial entrante 1 di yanüari 2024. Kolegio di Derechonan Humano i Defensor di pueblo (ombudsman) ketu bai ta pone preshon. Awor e union sindikal di Ulanda, FNV tambe a laga komprondé ku e kier yuda pone preshon. Igualmente ta e kaso ku Asosashon di Munisipionan Ulandes(VNG) i tambe gruponan di preshon Divosa i Solidatiteitsaktie.
No lubidá tambe ku UNKOBON tin un kaso den korte kontra estado Ulandes. Tambe mester bisa ku poko poko pero sigur prensa ulandes tambe ta dunando atenshon na e tema aki ku tur hende ta mira ku e aktitut di gobièrnu ulandes ta kontra derecho di hende i kontra di trato igual di nos den Caribe, siendo parti integral di Ulanda. Pues hopi movemento na Ulanda pa sali na defensa di nos hendenan vulnerabel pa nan por haña un ònderstant i penshun di behes na drechi i kuné por stipulá un sueldo minimo husto.
Awor nos aki na Boneiru kiko nos ta hasi pa sali pa nos derechonan fundamental ku ta hasta ankrá den nos konstitushon i rekonosé internashonalmente. Ta nos deber di sali i mustra kurashi i solidaridat i ku pa nos tambe ta basta di trata nos komo siudadanonan di segundo, terser i hasta di kuater rango. Ta 19 di dèzèmber último Rutte a pidi despensa pa e aktonan kruel kontra humanidat ku tabata sklabitut, kaminda no a respetá derecho di hende. Ata ni 4 luna despues, sekretaria di estado ta bin deklará unilateral sin konsultá ku nos aki na Boneiru ku e ta parker stipulashon di minimo sosial. Wèl aña pasá 5 di mei USIBO a kordiná un manifestashon popular pasífiko pa manda un señal kla i raspá ku mester hasi algu i minister Carola Schouten a hasi algu na e ònderstant, na e penshun di behes i e sueldo minimo, pero tur hende ta realisá ku e no ta sufisiente pasobra no a hasi mashá pa tene e gastunan abou, pues nos forsa di kompra no a mehorá i a mantené un gran kantidat di hende ainda den pobresa.
Meskos ku na Ulanda a forma un koalishon pa protestá aki na Boneiru tur kobradó di ònderstant, tur penshonado (nan ta mas ku 2 mil), tur trahadó, nan ta sigur 10 mil, tur miembro di tur e sindikatonan sin distinshon, pues miembronan di AFBW, ABVO, FEDEBON, NAPB-BES, SIMABO, STRAF, pero tambe miembronan di UNKOBON i simpatisantenan di tur e 6 partidonan polítiko ku a bai elekshon 15 di mart último, mamanan soltero, hóbennan adulto ku ta bishitá SGB, MBO i FORMA, i yut otro gruponan sosial i spiritual na Boneiru tur mester bin den un manifestashon di solidaridat huntu ku esnan ku a saka nan garganta i kabes aya na ulanda pa garantisá ku nos ta defendé nos derecho konstitushonal den un forma demokrátiko, sin miedo, sin tembla i ku balentia di un pueblo uní pa un kousa husto.
Laga mundu sa ku nos tambe aki na Boneiru ta sostené un minimo sosial digno i humano pa Boneiru, Saba i Statia.
I nos lo djòin e manifestashon di Solidaridat ora nos haña e yamada ku balentia i kurashi, pasobra nos ta konsiente ku ta pa defensa di un derecho fundamental di hende nos ta lucha.
