Durante di celebracion di acto protacolario riba Plaza Betico Croes dia 18 Di Maart activistanan di medio ambiente a bin protesta na e momento cu prome minister Evelyn Wever Croes tabata duna su discurso. Den un forma exclusivo EAnews por a combersa cu e activista Nigel Maduro cu ta un activista medio ambiental y ta un persona indigena di Aruba tambe.
Segun Nigel Maduro 18 di maart a cuminsa mane un protesta unda cu a lucha pa e dia aki y esaki ta nos raiz y na e momentonan aki kier mustra e lidernan cu nos kier cambio. E cambio medio ambiental. Nigel Maduro ta kere cu ningun hende no ta tumando e situacion na serio e cambio di medio ambiente, tin hopi situacionnan ta pasando na Aruba unda cu tin hopi daño na nos naturalesa, eco sistema, perdemento di tera, bendemento di tera, hopi hotel y na unda cu e sistema lo bay cay den otro. E sistema ecologico, social y economico.
Den e protesta Nigel Maduro ta exigi pa gobierno y parlamento tuma e tema di medio ambiente mane un prioridad. E ta un prioridad pa nos tur, Aruba ta nos isla y dia 18 di maart ta un dia perfecto pa trece e causa padilanti. Segun Nigel Maduro nos mester di cambio, Aruba ta di nos tur.
Nos tin cu stima Aruba y nos himno mes ta bisa Aruba dushi tera nos baranca tan stima, pero ban mustra cu nos stima nos tera. Nos lider nan mester cuminsa dal stapnan padilanti y para pa e naturalesa. Hopi ta e stapnan profesional cu a keda haci unda cu cartanan oficial a bay gobierno, a papia cu parlamento y hopi hende den ley, pero tambe a papia cu hopi activista, fundacionnan y algun ministernan tambe. Sinembargo haciendo tur e esfuersonan aki Nigel Maduro ta sinti cu e la wordo ignora aunke cu e la manda carta na DIP y Prome Minister Evelyn Wever Croes y na hopi otro hende, pero na final a keda ignora.
Nigel Maduro mes a studia y e tin un master of science den sostenibilidad, pero ningun hende no ta scucha. Debi cu no ta wordo scucha pesey mes a tuma e prome stap di pone graffiti pa lanta hende for di soño, awor ta na Aruba un biaha mas y lo sigui mustra y duna e mensahe y awor no lo ta so, pero tin mas activistanan cu a uni. Sinembargo hopi hende ya caba ta birando mas consciente unda cu hopi hende ta realisando cu nos mester di un cambio. Importante ta pa scucha nos hendenan.
Riba e dia patriotico haci mane bo ta stima Aruba, unda e reglanan ta, unda e regulacion y e cambio di ley ta. Actualmente ta wardando pa e lidernan den sostenibilidad cuminsa para. Nigel Maduro cu un siguridad ta vocifera cu nos kier nos tera bek y ta exigi nos tera bek. E naturalesa y Founa no tin voz , pero e lo ta voz pa e tera y founa pa por duna e mensahe pa nan unda cu nos mester lanta para pa nos naturalesa.
Sinembargo hopi biaha ta trata di combina desaroyo unda cu hende mester por biba y come pero na mes momento cuida e naturalesa. Ta kere firmemente cu meter trece un balans , pero Nigel Maduro ta di opinion cu tin un balans cu ta cana mucho na e banda economico y ta focus mucho riba turismo, pero nos ta lubida cu nos naturalesa ta esun cu ta trece turismo, cu ta esun cu ta trece hende na Aruba cu kier wak e naturalesa. Esaki ta pone cu si e sistema di naturalesa cay nos economia tambe ta cay e ora ey no tin pan pa ningun hende. Ta importante pa busca e balans pero tambe ta importante pa duna e naturalesa mas poder.
Nos tur ta biba cu naturalesa nos tur t’ey door di naturalesa y sigur kier mira e balans yega bek na desaroyo sostenibel enbes di crecemento debi cu hopi hende ta bruha entre crecemento y desaroyo debi cu nos ta creciendo demasiado y nos no tin suficiente tera. Esaki ta significa cu nos mester di desaroyo sostenibel debi cu nos no tin esaki na Aruba. Tur esaki ta e mensahenan cu kier trece padilanti debi cu e balans a cay afo, Segun activista Nigel Maduro.
