Nos ta kere kambio di sueldo minimo hubenil

Frakshon di MAN a entregá proposishon di lei despues di Konseho di Raad van Advies

Resientemente frakshon di MAN a entregá e proposishon di kambio di lei den Landsverordening minimum lonen despues ku a hasi e kambionan nesesario konforme konseho di Raad van Advies . E inisiativa di lei aki a inisiá na òktober 2020 kaminda e lei a bai pa SER i RvA pa konseho. 

Manera ta konosí aktualmente den e lei ku ta regla tarifa pa suèldu mínimo tin diferente tarifa di kua esaki ta mará na edat a base di porsentahe. Aktualmente un persona ku tin 20 aña ta kobra 90% di e tarifa di suèldo mínimo ku lei ta preskribí, 19 aña ta 85%, 18 aña 75% i 17/16 aña 65%. 

Ku e proposishon di kambio di lei aki ta trese kuné ku un persona for di su 18 aña ta kobra 100% di e tarifa di suèldu mínimo ku lei ta preskribí. Motibu di esaki ta ku un persona for di 18 aña bai ariba ku pa lei ta un mayor di edat i ku ta haña e derechi di por atendé tur su kosnan legalmente su mes sin mester di outorisashon di entre otro su mayornan. Segun International Labour Organization (ILO) tur hende ku ta laborá mester risibí pago igual pa trabou igual (equal work, equal pay). Tambe un persona ku tin 18 aña ku ta laborando tin e mesun derechinan ku esun di 21 aña i no ta konosé diferensia entre gastunan di kosto di bida. 

Minister di SOAW Sra. Larmonie-Cecilia durante rueda di prensa di último kaminda a anunsiá oumento di sueldo mínimo, Minister a pone atenshon riba sueldo mínimo hubenil i a indiká di ta konsiente di e inisiativa di lei ku ta kanando. Nos ta kontentu ku minister ta mira e importansia pa trese kambio den sueldo mínimo hubenil. 

Frakshon di MAN ta dispuesto pa sinta ku Minister di SOAW pa deliberá i interkambiá riba e proposishon di lei aki ku nan a presentá. Frakshon di MAN ta konvensí, ku e kambio aki lo karga sosten di parlamento mirando ku esaki ta  trese igualdat den pago di salario na e trahadó.