Participacion di Cas di Cultura na e intercambio di “Dutch Caribbean Heritage Platform” na Islanan Ariba ta haci nos rico na conocimento .Na luna di Mei ultimo, representando Cas di Cultura, sra. Vicky Arens, directora, a participa na un intercambio y congreso di 5 dia organisa pa e ‘Dutch Caribbean Heritage Platform’ (DCHP), cu e tema ‘Awareness’, esta conscientisacion. Riba e islanan Sint Maarten, Saba y Sint Eustatius e intercambio a tuma luga cu representacion amplio di miembronan di DCHP.
E congreso a cay bou liderazgo di Monumenten Fonds Aruba y Erfgoed Academie, cu conhuntamente a logra di crea un red impresionante di expertonan y institutonan Caribeño pa ta miembro di DCHP, tanto den nos Reino como pafo di dje. Representante di otro islanan tambe a tuma encargo pa organisa partinan di e programa y Aruba tabata bon representa door di mas organisacion y profesionalnan den e ramo di herencia.
Riba cada isla por a inventarisa observacionnan interesante, bon y menos bon, tocante entre otro: e
status di importancia di preservacion di monumento (natural y traha pa hende); esfuersonan cu ta
wordo haci riba nivel gubernamental; organisacionnan independiente y nan proposito y esfuersonan; e grado di conocemento riba e topico di kico por wordo considera como herencia of no, e grado di importancia cu ta duna na e herencia colonial y di sclavitud, e grado di conocemento historico pa cu obhetonan, sitionan y custumbernan propio, accionnan cu ta wordo tuma pa salvaguardia herencia y hopi mas intercambio interesante.
Locual a bini na cla mas ainda ta cu nos storianan historico y di herencia Arubiano ta importante,
interesante y mester wordo comparti. Den caso di Cas di Cultura, no tin miho manera cu pa conecta
esaki directamente cu su localidad (Klip / Mon Plaisir), contando e principionan di e paisahe y di nos
Centro Cultural y alabes pa haci esaki accesibel y interesante pa hoben y otro bishitantenan.
Nos ta para riba schouder di nos antepasadonan, nan forsa y resiliencia a guia nos te na e presente. E coneccion entre pasado y presente ta bisto den hopi manera, pero nos no ta para keto riba esaki
suficientemente. Por haña rasgo di pasado, tanto positivo como negativo, for di micro (custumbernan na cas) te na macro (politica, paisahenan, custumbernan general), incluyendo nos paisahe socio- cultural.
Un punto importante pa nos nacion, anteriormente colonisa, ta pa bira mas fuerte door di compronde pasado y nos descendencia pa bira resiliente. Cas di Cultura lo contribui na esaki cu un exposicion permanente den su edificio renova, pero tambe pa medio di programanan recurente. Nos siguiente accion a corto plaso ta pa aplica pa un voucher di co-creacion di Mondriaan Fonds pa cuminsa un proceso di investigacion basa riba sesionnan comunitario y investigativo pa desaroya e exposicion permanente aki, cual tambe mester resulta den un concepto curatorial pa e composicion y experencia di esaki.
E exposicion aki ta sirbi como un pida di e puzzel den e plan di renobacion y embeyecemento di Cas
di Cultura como institucion di herencia cultural na Aruba. E vision, despues cu e exposicion
permanente ta na su luga, ta cu e lo ta libremente accesibel pa tur bishitantenan di tur edad y cu e
por haya elementonan interactivo pa e tin un impacto riba e bishitante.
Cas di Cultura, esta Stichting Schouwburg Aruba, ta duna un danki grandi na CARE Aruba Funds,
maneha pa Prins Bernhard Cultuurfonds Caribisch Gebied, cu a aporta pa haci e intercambio aki
posibel. E tabata un gran fuente di informacion y inspiracion pa yuda e desaroyo continuo di Cas di
Cultura como parti integral di nos comunidad, ya pa casi 66 aña caba.
